ZALEN December 3, 2024 : Kumin 2024 December thla chhungin Mizorama blood bank hrang hrangah 'Krismas puala thisen pek' kalpui leh tan a ni a, vawiin chawhma dar 11 khan Civil Hospital, Aizawl Blood Bank-ah Senior Medical Superintendent Dr ST Lalruatfela'n a hawng. Youth Icon 2024 star pahnih Lalsangliana leh J Lalrosanga ten thisen petute hi an tlawh.

Krismas puala thisen pek huaihawtnaa hma latu AVBD chungah a lawm thu sawiin Dr ST Lalruatfela chuan, "Hospital ringawt hmalaknain damlote thisen mamawh kan phuhru thei lo. Anni hmalakna azarah mi rethei zawkte leh mamawh ngawih ngawihte'n thisen an dawng thei a ni," a ti a; Krismas puala thisen pe turin thalaite a sáwm a ni.

Krismas puala thisen pek hi AVBD, MSACS leh blood bank hrang hrangte huaihawt a ni a, kumin December thla chhung zawng kalpui a ni dawn. Blood bank-ah kalin thisen pek theih a ni a, thisen petute hnenah ei tur tuihnai tak leh thilpek pek zel a ni ang.

Vawiina Krismas puala thisen pek hawn ní-ah hian Civil Hospital Blood Bank-ah Mizo Higher Secondary School zirlaite'n tun hnaia zawh tak Mizoram HSS Games 2024-a an champion lawm nan thisen an pe nghal a ni. Thisen petute hi Youth Icon 2024 star pahnih Lalsangliana leh J Lalrosanga ten an tlawh kual bawk.

TUN HNAIA AIZAWLA KRISMAS PUALA THISEN PEK ZAT

No.   Blood Bank   2019   2020   2021   2022   2023

1.   Civil Hospital, Aizawl 690   1,108   1,378   1,661   1,142

2.   Synod Hospital   338   179   317   267   199

3.   ZMC Blood Bank   64   26   128   NA   302