Dam chuan hun leh ni te hi an ral chak mang tak emaw! Kum bul kan tan chuah emaw tih laiin kum tawp kan lo thleng leh ta reng mai. Kan hunpui Krismas pawh kar leh maiah kan lo thleng leh dawn ta. Kan changkang tial tial a, hma kan sawn tial tial a, Krismas kan hman dan pawh a da zat tial tial ta mai em? Ngaihtuah tham tak a ni. He hunpui a lo then hian Bethehem ngaia lungleng, nausen Isua hmuh chaka tuihal engzat tak awm ang maw?

Kan nu leh pa, kan pi leh pute hun lai chuan Krismas lo thleng tur hi er thapuiin an er a, ram lam hnathawk an nih avangin an buh bal thar te chu hunpui lo thlen hma ngeia buhzema khung fel an duh a, hah pawh sawi loin an thiar tlauh tlauh thin. Thlasik rim a lo nam a, tlangsam leh tlaizawng a lo par a, an lung a leng em em a, an rilruin Bethlehem lam a hawi a, suangtuahnain Bethlehem dai phul an fang a, an mitthlah nausen Isua leh a chawitu Mari an lo lang zut zut thin.

Zan boruak thiang tak hnuaiah Mas thleninah an kal khawm a, zaiin Pathian an fak a. Electric eng te awm ve mah suh se chu chuan an tuina leh lunglenna a sut dal zo chuang lo. Inchawih mawi taka khuang leh seki tum rik karah:

“Ka Lal zan chamna hmun aw ka va ngai zual thin em!
Berampu ruala kal ka nuam Bethlehem tlang chungah.
Nausen puana tuam chu zawtin hril thei se la,
A siam Salem khawpui tualnuam chu a ngai mah lo ang e,” tih hlate chu tui em emin an sa a, men pawh an meng phal mang ngai lo. Khawvel thila hlimhlawp bawlna te chuan an thinlungah hmun a chang lo a, Krismas neitu fak leh chawimawi chu an tih theih sang ber a ni a, Krismas neitu nen chuan Krismas tak an hmang a, hlimna leh lungawina chuan an thinlung ram a fan chhuak a, chatuan lawmnain an khat liam thin.

Tunah erawh nun a dang ta. Krismas kan nghahhlelh chhan te, kan hman tum dan te nen lam hian a buk thelhin kan thelh ta deuh em? He hunpui hi tisa hlimhlawp bawl nan, mahni inhaivur nan, thawmhnaw thar neih nan, ei leh ina intuithuah nan leh chhungkaw inhmuhkhawmna hun remchangah kan ngai ta deuh mai em? Sumdawng te lahin a tam thei ang ber hlep tumin an hman hlel a, ringlo mi kan tih te pawh kan tluk ta mang lo. Ringlo mi te zawk chuan an sakhaw hunpui a lo thlen hian an dawr bungrua te tum dang zawng aiin an ti tlawm a, a tam thei ang berin a zar lo zo ve se an ti ni ngei tur a ni. Keini erawhin tum dang zawng aiin kan thil zawrh man kan tisang a, sumdawng thenkhat phei chu kum tluana an lei chhuah aiin Krismas vuakveta an hlawkna hi a sang zawk mah awm a sin maw le. Heng te hi Krismas rilru nen chuan a inrem chiah lo.

Nula leh tlangval te lahin bialnu bialpate nena interek hranna hun remchangah an lo hmang ve bawk a. Krismas denchhena kan hla phuah ve te hian Bethlehem lam a hawi mawlh lo. ‘Nang nena Mas hman dun ka nuam a sin’ han tih te chuan thlarau nun a chawm mawlh lo. Heng te hi thalai tam takin mas kan hman tum dan a nih chuan kan ti dik lo hle tihna a ni. Kristian kan ni a, kan sakhaw hunpui ber sual rawngbawlna hun remchanga kan hmang hi thil inhmeh lo tak a ni. Kan sual duh a nih pawhin hun dang a tam tho. Entir nan, Hindu ho hian an sawkhaw hun pawimawh Diwali lai hian an sakhua nena inkhaihhnawihna nei hlek loah in ham buaiin, thil sual tihna hun remchangah hmang ta chiam mai se awm lo kan ti ngawt ang. Chutiang chiah chuan Kristian inti siin Krismas denchhena sual rawng kan lo bawl ve chiam hian kan sakhua hi kan diriam hle tihna a ni.

A tak takah chuan zan khaw tairek thlenga lirthei nena khawlai fang a, tlan kual a, au thler duai duai chunga car tape ring taka play te hian mas an hmang miah lo. Krismas denchhenin an duh dan danin hlimhlawp an lo bawl ve satliah mai a ni. Rilrua inngaitlawm a, Bethlehem ngaia lungleng a, nausen Isua hmuh chaka tuihal te hnenah Christmas tak a lo thleng thin.
“Aw tunah hian i kal ang u,
Hmun khawhar lam chu i pan zel ang.
Lei lal ten amah do mahsela, mipui te zawng pawhin,
Kei chu ka lal duh, ka lunglai hnemtu,
Hmun khawharah pawh aman min awmpui ang.”