December 1, 2023; NGO Coordination Committee (NGOCC) huaihawtin vawiinah Kristiante Ni serh humhalhna punkhawm' buatsaih a ni.

Aizawl a he hun hmanna Raj Bhavan North Gate bulah NGOCC chairman leh Central YMA president ni bawk Lalhmachhuana chuan, Election Commission of India (ECI) in kan Ni serh pawimawh tak vote chhiar ni a an rawn puang chu kil hrang hrang atangin sawn tura ngenna lehkha thawn thlak a ni tih a sawi a, chhanna erawh vawiin thlengin dawn a la ni lo niin a sawi.

"Kan duh lo chung chung-in kan sakhaw ni pawimawh ah vote an chhiar lui dawn a nih chuan party office zawng zawng hi sunday ah i khar vek ngam ang u," tiin, "Vote chhiarna hmun a kal tur te pawh kal lo ngam ang u, candidate tlinh te pawhin certificate la lo ngam ang u, chutiang anga kan dodal theih phawt chuan kan nihna mih hrechiang khawpin ka ring," Lalhmachhuana chuan a ti bawk.

NGOCC chairman bakah hian NGO dang, MHIP, MSU, MZP leh MUP president theuh ten thu an sawi a, NGOCC secretary Prof. Malsawmliana'n ECI hotute New Delhi an dawr dan report pein, resolution a chhiar chhuak bawk.

RESOLUTION :

1. ECI in Mizoram Assembly inthlanpui 2023 vote chhiar ni atana Kristian te ni serh leh Pathian kan biakna ni December 3, 2023 hi tha lo kan ti a, pawi kan ti takzet a ni.

2. ECI hian vote chhiar ni atan a Pathianni a ruat tawh hi sawn ngei turin vawiin a kalkhawmte hian kan ngen nawn leh a ni.