April 29, 2022; Aizawl leh Mizoram hmun hrang hranga Kuhva rah (kuhva hring) hmanga sumdawnna ah, Mizo sumdawngte chimralin an awm mek nia ngaihtheih turin hnamdang sumdawng kuhva zuar ten bu an khuar nghet tawh a, hetihlai hian, chung sumdawnna titawp tura Mizo sumdawngten hma an lak tak takna ah erawh an hmachhawn chu, hnamdang sumdawng ten hmatheh a an hman leh an thurualpui Mizote tho an ni.

ZALEN thudawn danin, tun dinhmun ah kuhva phur lirthei thlenkhawmna leh a zawrhna hmun lian ber Zarkawt huamchhungah Mizo kuhva zuar a sumdawng mi 80 atanga 90 bawr vel an awm a, Bawngkawn huamchhungah 20 atanga 30 bawr vel an awm. "Tun a a lan dan ah chuan kuhva bag 100 rawn thleng se, bag 95 hnamdang sumdawng ten an chang a, Mizo sumdawng te chan chu bag 5 emaw vel chauh a ni, chutiang khawp chuan Mizo ten kan ei nasat kuhva sumdawnna ah hian Mizo sumdawngte chimralin kan awm, sumdawnna tawpsan ta pawh an tam" thudawnna chuan tiin, chumi tireh a, titawp tur chuan Mizoram hmun hrang hranga kuhva zuar a sumdawngte tanrual a tul takzet tawh niin a sawi.

Kuhva sumdawnna a hnamdang inrawlh nasa lutuk titawp tura hma an lakna kawngah Mizo sumdawngten an hmachhawn chu Mizo tho an ni tih ZALEN thudawnna chuan sawi bawkin, "Hnamdang ten ILP kalphung hi an hrechiang lutuk a, thurualpui tur an dap a, Mizo ta anga lang pawh a tak takah chuan a neitu tak chu hnamdang sumdawng deuh vek an ni," a ti bawk.

Tunah hian Mizo sumdawngten an din Mizo Pan & Kuhva Zuar Association a awm a, an hruaitute chuan tangrual a hmalak a nih theih nan Mizoram hmun hrang hranga kuhva zuar te chu an pawl a inchhungkhawm turin an sawm a ni.