Aizawl: Bilkhawthlir khuaa kuhva kau atanga thleng leh plate siamtute chuan mipui mamawh an pe hneh lo tih an sawi.

Tun hnaia Bilkhawthlir khua tlawhtu Zalen palai hnenah he thu hi sawiin Bilkhawthlir South VC huam chhunga Self Help Group intelkhawm pawl Village Organisation (VO) hruaitute chuan kuhva kau atanga thleng an siam chu pakhat Rs. 6 leh plate chu pakhat Rs. 2-in an hralh thin tih an sawi a. An thil siamchhuah chu a tlangpuiin Aizawl lamah an hralh ber nia sawiin an duh angin an pe hneh lo a, tunah pawh hian Krismas ruaithehna atana hman tur order an dawng tawh niin an sawi. VO hruaitute chuan an thil siam chu a thianghlim tawk nia sawiin, “Uluk takin kan sil a, a siamnaah hian engmah damdawi kan hmang lo a. A siamna khawl sa hian natna awm te a tihlum vek thei a ni,” an ti bawk.

Bilkhawthlir South VC huamchhungah hian VO 1 awmin SHG 17 an awm a, an vaiin member 140 vel an awm a ni. SHG tin atang hian an aiawh mi 2 zel inruatin chung mite chuan VO hruaitu an thlang thin a ni.

Kuhva kau hi an chharkhawm thin bakah a chang chuan an lei ve thin niin an sawi a, September thla atanga March thla velah a tla tam bik nia sawiin a dahna tur hmun tha an neih lo chu an harsatna a nih bakah khawl dang nei leh thei se chuan an thil dehchhuah pawh a tam zawk dawn thu leh kuhva kau tam lai chuan ni khatah thleng 400 atanga 500 inkar an siam thei niin an sawi bawk.

Bilkhawthlir South Village Organisation (VO) hian tun dinhmunah sum lengvel nuai 28 chuang an nei mek a, an sumte hi an member-te hnenah community investment fund atangin 1% pungin an puktir thin tih an sawi a. “Nuai 2 puk hi kum 2 atan leh nuai 1 puk hi kum 1 chhunga rulh turin kan ti a, kan chhawr tangkai hle a, tun thlengin rul tha lote avanga harsatna tawh kan la nei lo a ni,” an ti.

Loan puktute hian kuhva huan siam nan te, ar vulh nan leh thil dangah te an hmang thin a ni.