6th July: Tukin zing dar 6:30 vela Kawrthah leh Rengdil inkara dan loa kuhva tawlh ruk phur nia hriat motor lian 2 leh an kuhva phurh  bag 120 kan chhan chu  'tek tlain a den' vanga kangral niin thu a darh mek a. Hachhek Bial Kuhva Chingtu Pawl (HBKCP) te chuan police thenkhat chu ring zo tawh lo nia thu a darh laiin police lam chuan kuhva phur motor 2 chu Zamuang a police check gate barricade chu hela tlan tlang luiin midang um tute chuan an nang ching ta niin an sawi bawk.

Kawrthah atanga thudawn danin July ni 5 zan khan Zamuang kal tlang tur Kuhva phur motor a kal thu kuhva chingtute'n thu an dawng a.  Zamuang police check post ah police thenkhat an rin tawh loh vangin enthlatu an indah a, "Heng enthlatute hmuh lai reng hian police te hian motor chu reilote tidingin a number an en zawk an chhuah leh a ni," tiin Kawrthah atangin ZALEN chuan thu a dawng bawk a. 

Hetiang a nih tak avang hian mipui lam chuan motor-in  Zawlnuam lamah umin a khaw thlen hma deuhin (12.30 AM bawr)an nang ching ta niin thudawnna chuan a sawi bawk a. Zamuang leh Rengdil inkarah hruai let lehin motor 2 te kan chhan erawh an hre tawh lo a, 'tekin a denga an kang' tih chu an rin dan a nih thu an sawi bawk. Mipui thinrim chuan check post chu an tichhhe nual nia thudawn a ni bawk.

ZALEN in Rozarliana Hmar, SDPO Kawrthah chu biain, "Kan naute'n an report dan chuan Zamuang a check post hi kuhva phur motor liante hian 'an paltlang pawp a' duty te hian Zawlnuam lam police an hrilh nghal a. Kuhva chingtute lam atangin lo umzuitu an awm bawk a," a ti a. 

"Dan anga hma laa kan kuta an mi mante pe turin HBKCP hruaitute nen pawh kan inbe fel titih hmana. Hetih lai hian Kawrtethawveng lam atangin kuhva chingtute lo thlen belhin a hranin an sawikhawm leh a. An mi mante kan kutah min pe dawn emaw kan tih laiin motor 2 te chu a kang tih kan hre ta mai a ni," tiin SDPO chuan ZALEN a hrilh a ni.

SDPO sawi danin police lam hi an tam loh avangin an indaih lo hle a. Zamuang check post-ah pawh hian IR 2 leh MRP 2 duty thin an ni a, tunlai hian IR lam hi lakchhuah an ni a, police 2 chiahin an veng hrih niin a sawi. 

SDPO chuan motor leh mihring te chu khawih lo turin campaign an bei nasa niin a sawi a. Kuhva chingtu hruaitute hnenah pawh an naute hrilh turin an sawiho fo tawh niin a sawi bawk. 

Report dang atanga kan dawn danin lirthei kang ta hi MZ 01K 9510 (Ashok Leyland) a khalhtu leh neitu ni a hriat, Lalramthara S/o Lalnunsanga Maubawk leh MZ 01K 9511 (Ashok leyland), a khalhtu leh neitu ni a hriat C. Lalbiaktluanga S/o C. Lalrinawma Falkland Aizawl te an ni. 

Kawrthah atanga report dang dawnah chuan he thil thleng chungchangah hian Hachhek Bial Kuhva Chingtu Pawl (HBKCP) chuan a hranpa thuchhuah siam an tum lo a, special duty te mithmuh lai ngeia thil thleng niin hetiang hi thil awmdan a nih avangin police leh mipui inkarah inpuhmawhna fel lo tak awm thei a nih avangin, HBKCP hruaitute chuan thu belhchian dawl lo thehdarh lo tur leh fimkhur turin mipuite  an ngen a ni.