Aizawl July 25, 2024 : Parliament Monsoon Session neih mekah Mizoram MP K.Vanlalvena chuan Zero Hour-ah thu sawiin ram pawn atanga Kuhva leh Sawhthing lak luh chuan hmarchhak a kuthnathawktute te a nghawng a, tih tawp a phut thu a sawi a, Assam Rifles leh Custom te mipuiin an ringhlel niin a sawi bawk.

North East-a kut hnathawktu ten an thlai thar kuhva leh sawhthing hralhnaah harsatna an tawh thu leh thenawm ram dangte atanga heng thlaite hi India rama lak luh vang a nih thu Vena chuan a sawi. North East mipui tam takte ei leh bara an inghahna chu Kuhva leh sawhthing a nih thu tarlangin Myanmar atanga dan lova kuhva ro tamtak Mizoram leh Manipur kal tlanga lakluh a nih thu K. Vena hian a sawi chhuak.

India leh Myanmar ramriah India sawrkar-in Custom leh Assam Rifles te a duty tir chungin ramri kal tlangin Smuggler ten Kuhva ro tam tak an la lut a. North East mipui tam tak rin dan chuan heng smuggler te leh sawrkar mi rawihte hi tangrualin heng sawrkar phalloh Kuhva ro tamtak hi ramri kan-in an la lut nia an rin thu a sawi chhuak bawk.

Central sawrkar-in China atangin sawhthing tam tak a chaw lut tih Vena chuan a sawi chhuak bawk a. Tul lo taka heng sawhthing leh kuhva foreign atanga lak luh hian North East-a kut hnathawktute eizawnna a tih chhiat avangin Sawhthing leh Kuhva lakluh hi tih tawp thuai a phut thu K. Vanlalvena chuan a sawi bawk a ni.