Aizawl: Mizoram sawrkarin dan loa Myanmar atanga Mizoram kaltlanga kuhva tawlh ruk venna tura checkgate a siam, Serchhip dai Sailiamkawn leh Sairang ah dan loa tawlh ruk kuhva man a la ni lo a, heng hmun a police duty te chuan dan loa kuhva tawlh ruk a chawl/tawp rih nia a lan thu ZALEN an hrilh a ni.

Sailiamkawn checkgate a duty te hnen atanga ZALEN thudawn danin, checkgate hawn a nih atanga nimin thleng khan lirthei an enfiah tawh zingah kuhva rah tawlh ruk man an la nei lo a, khawchhak lam atanga bungraw phur lirthei lutte endik uluk zualin, rinhlelhawm thei ang chi te report an dawng zung zung thin a, anmahni hela kuhva tawlhru an awm leh awm loh erawh an hriat theih loh thu an sawi. 

Sailiamkawn checkgate hi February 17, 2022-ah hawn a ni a, chhun zan zawmin police 4 an duty a, kuhva tawlhruk bakah hian foreign atanga dan lo a bungraw lut ang chi te pawh duty te hian an endik thin.

Sairang checkgate lamah pawh tun dinhmunah chhun zan zawmin police 2 zel an duty a, duty bul an tan February 14, 2022 atanga nimin thleng a lirthei thahnemtak an endik tawh atangin kuhva tawlh ruk man an la nei lo.

Checkgate duty te chuan state pawn lamah an phurh tlang theih tawh loh avangin tawlh ruk tum an awm vak tawh lo a nih theih thu an sawi a, a lan dan ah chuan kuhva tawlh ru an la awm a nih pawhin, tunhma lam ai chuan a tlem tawh thu leh tun dinhmunah chuan a tawp lailawk ni hial a an hmuh thu ZALEN an hrilh.  

Central YMA chuan kuhva tawlh ruk venna tur checkgate siam turin chief minister Zoramthanga leh sorkar hotu dangte an ngen thin a, chumi hnuah Sailiamkawn leh Sairangah checkgate hawn a ni.