Aizawl May 19, 2024 : 7.5.2024 khan Vanramchhuangi’n kuhva ro tawlhruk chungchanga Public Interest Litigation(PIL) a thehluh chu Gauhati High Court, Division Bench, Chief Justice Vijay Bishnoi leh Justice Michael Zothankhuma thutna chuan a ngaihtuah.

Court chuan an Order dt.22.1.2024 ah kuhva ro tawlhruk chungchangah, petitioner leh respondent te thu thelhluh (affidavit) atangin an hmuhdan chiang taka an tarlan tawh hnuah leh state sawrkar chu petitioner FIR thehluh chungchanga investigation thar kalpui tura a tih hnuah leh FIR thar pawh an register theih thua thupek a pek hnuah pawh petitioner FIR chu register chhunzawm loh a la ni leh zel chu a lungawi thlak loh hle a ti a ni.

Court chuan Vanramchhuangi FIR thehluh chu register lovin Investigation officer chuan a hmain CJM, Champhaiah application thehlutin chhui phalna a dil a, chu application chu CJM, Champhai chuan dt.7.1.2022 ah a hnawl sak a, chu mi hnuah High Court chuan 22.1.2024 ah Order a siam a, he order a siam hnuah pawh CJM, Champhai ah tho chuan chhui phalna police lam chuan an dil leh a, hei hi High Court chuan an order 22.1.24 siam chu Officer in charge, Champhai chuan a zawm lo lui a tih bakah state sawrkar chuan he thil hi a ngai thutak tawk lo a ni a ti. Chutiang a nih avangin High Court chuan Chief Secretary chu Ama mimal insawifiahna (personal affidavit) theh lut a, eng vanga Court Order Dt. 22. 01.24 an zawm loh chhan sawifiah turin a ti.

CS bakah Officer-in-Charge, Champhai Police Station pawh ama mimal insawifiahna (personal affidavit) theh lut a, petitioner Vanramchhungi’n kum 2021-a FIR a thehluh chu tun thlenga register a nih loh chhan sawifiah turin a ti bawk a ni.

He PIL No. 5/2022 hi karthum hnuah ngaihtuah leh tura tih a ni.