Aizawl:June 28, 2022 leh July 7, 2022 -a Hachhek Constituency-a Zamuang khaw daia Kuhva tawlhruk man a nih dan leh Kuhva tawlhruk avanga khua leh tui te harsatna tawh chu sawrkarin chingfel se a duh tih Lalrindika Ralte, MLA chuan thuchhuah siamin a tarlang.

Hachhek bialtu chuan, "Ram dang atanga dan lo a Kuhva lo lut avanga Hachhek bial mipuiten kan Kuhva tharchhuah hralhna kawnga harsatna kan tawk thin hi pawi ka ti takzet a. A chhan bulpui ber chu dan lo a Kuhva lo lut, Mizoram chhunga awm ngei pawh man duh lo sawrkar kan neih vang niah ka ngai. Dan loa ram dang atanga Kuhva lo lutin a khua leh tuite tan harsatna nasa tak a siam sak tih hi Mizoram sawrkar hian min hriat nawn sak se ka duh a. A rang thei ang bera Kuhva tawlhruk titawp tur leh kuthnathawktute harsatna sukiang turin Mizoram sawrkar ka ngen bawk a ni," a ti.

Rindika chuan, "Heng dan lo a Kuhva tawlhrukte hi sawrkar hnuaia dan leh thupek kengkawhtute man ni lovin, tlawmngai a duty kuthnathawktute man a ni nghe nghe. Sawrkarin dan leh thupek a kengkawh tur a nih lai a, sawrkar check gate paltlanga Kuhva tawlhruk, mi tlawmngai duty-ten an man zawk tlat hi thil kalphung tur a ni lo a. Sawrkarin a tih tur a tih loh vanga hetiang thil hi thleng a ni tih hi ka ngaihdan a ni," a ti bawk.

Kuhva tawlhrukna ti tawp tura tlawmngai taka duty a bial mipui, kuthnathawktute thawhrimna leh inpekna chu a chhuan leh an hmalakna a thlawp tih a tarlang bawk.