India player chhuanvawr, Lallianzuala Chhangte chuan kum 10 zet a chhungte kiang lova hunpui a hman tawh thu leh a chang chuan a lung a leng a, “Haw ve mai a châkawm rum rum thin,” tih a sawi.

Lunglei tlangval, Lianzuala hi DSK Shivajians Liverpool International Football Academy-in kum 2014-a Under-18 team-a khel tura an thlan hnuah a chhungte kianga Krismas leh kum thar a la hmang leh ta miah lo va, kumin hi a kum 10-na a ni tawh.

Thla thara Qatar-a AFC Asia Cup khel tura India team-a awm mek, Lianzuala hian Thawhtanni tlai khan social media kaltlangin a lung a len thin thu leh haw mai châk chang a neih thu hi a tar lang.

“Ka club leh ka ram tana min kohna chhangin a zawnin kum 10 lai chu in lama ka chhungte leh ka thiante tel lovin Krismas leh kum thar ka lo hmang ve ta reng mai. A châng chuan lung a lengin kan hna kalsana haw ve mai a châkawm rum rum thin,” a ti.

Hun harsa thleng mah se hei hi a hnu lawka ni êng mawi tak chhuahtir lehtu a ni thin tih a hriat thu a tar lang tel bawk.

India rama football khelte hi Kristiante hunpui hi an tul lai a ni ve tho va. India tana vawi 32 khelha goal sarih thun tawh, Lianzuala pawh hi Krismas urlawk ni pawh khan Indian Super League (ISL)-ah a la inlan a, December 28 maiah pawh khan Chennaiyin FC lakah goal a la thun a, si thum faiin an chak nghe nghe.

A tuk tuk lehah India tana inlan turin ram pawna zin chhuak zingah a tel zui lehnghal bawk a ni.

All India Football Federation (AIFF) Player of the Year leh Footballer Players Association of India (FPAI) Indian Player of the Year ni mek, Mumbai City winger hian a fan-te chu kum thar chibai a buk a, “Kum lo thar hian i nunah beisei thar pe che sela. Vawiin dam taka i thleng thei hi chhan a awm ngei ang. I nunah Pathian a la beidawng lo va, nangmah kaltlangin thil tam tak tih duh a la neih vang a ni. A hruai theih turin lo awm ang che,” a ti.

Kum 26 mi, India player pawimawh ber pakhat hi Mizoram Premier League (MPL) Season 3 play off-a Lunglei FC tana rawlthar mai a nih laia a inlan atanga Mizoram football khawvela hriat tan a ni a. Season liam taah khan a che tha a, a chet dan enin India rama player tha bera thlan pawh hi a phu hle.

Season liam taah khan club leh ram tan inelna hrang hrang vawi 46 a inlan a, goal 21 thunin a thiante thun tur vawi 10 a siamsak bawk.

Club tan ISL Shield a pet chhuak a. Ram tan Intercontinental Cup hlawh chhuakin final-a Lebanon an hneh tumin Player of the Match atan thlan a ni a. July 4 khan SAFF Championship final-ah penalty petah Kuwait hnehin hun pangngaia 1-1 a an inhnehtawkna goal a thun bawk.

ISL-ah hian player tha ber nihna hauhvin Golden Ball a dawng a, Durand Cup-ah pawh hetiang tho hi a dawng zui a. FPAI Indian Player of the Year atan thlan a ni zui a, a aia hlu, AIFF Player of the Year atan thlan a ni leh ta a ni.

January 12 atanga khelh tan tur, Asia Cup khel tura Dubai-a inkulh mek India team-ah hian Lianzuala bakah Mizo tlangval dang pahnih, defender Lalchungnunga leh midfielder Lalengmawia (Apuia) Ralte te pawh an awm a, January 13-ah Australia hmachhawnin intihsiakna bul an tan ang.