ZALEN Nov. 5, 2024; James Lalnuntluanga (19) S/o Ruthi Lalnunmawii Vairengte IOC veng chu ni thum leh zan thum a bo hnu-ah dam tak a hmuh leh a ni.

James Lalnuntluanga IOC veng hi 2.11.2024 chawhnu dar 1 vel a an in atanga a chhuak chu ni thum leh zan thum a bo hnuah nizan dar 11 rik hma deuh khan IOC veng chhak kawngpui dung tlak lama Zarmawia huan mawng, Ramhluna huanah hmuh a ni a, eiturte pek a nih hnu ah nizan khan him takin an chenna in thlengpui leh a ni.

Vairengte IV VCP Lalramchhana sawi danin, James Lalnuntluanga hi nizan dar 7 bawr vel khan Zarmawia huan mawng, Ramhluna huan ah hian mithenkhat ten thawm an hriat bawhzuiin an zawng a, amah James Lalnuntluanga pawh hi hmuh a ni a, hemi tum hian James-a Lalnuntluanga chuan a kawr phelhin mipui amah zawngtute hi a tlan san a, hemi hnu hian mipuite hian tharthawh lehin, a tlan chhiatna kawrah an zawng chhunzawm leh a, nizan dar 11 rik hma deuh khan huan mawngah hian hmuh leh a ni a, hemi tum erawh hi chuan mipuite hian James Lalnuntluanga hi an hual a, tlanchhiat ngaihna a hriat loh avangin mipuite hian amah hi an hruai haw thei ta a ni.

James Lalnuntluanga hi rilru lama harsatna nei a ni a, hmuh a nih hian a taksa lamah hliam emaw dam lohna emaw a nei lo.