Aizawl: Nikum 2018 chhung khan Mizoramah nau piang 20984 awmin thi 5525 an awm bawk a, nau piang zingah hian mipa an tam zawk a, mitthiah pawh mipa an tam zawk bawk.

Economics & Statistics department-in tun hnaia an tihchhuah, ‘Annual report of registration of births & deaths Mizoram 2018’ tarlan danin nikum chhunga piang zingah hian mipa tam zawkin 10685 an piang a, hmeichhia 10299 an awm bawk.

Chhinchhiah danin nikum chhung vek khan thi 5525 an awm a, heng zinga 3502 chu mipa niin hmeichhia thi 2023 an ni a, nikum chhung vek khan naupang thi 304 leh nau thi saa piang (still birth) 40 an awm nia chhin-chhiah a ni bawk.

Doctor-ten damdawi ina thi mi 3280-te thih chhan an chhuichianna, ‘Medical Certification of Causes of Death (MCCD)’ tarlan danin thihna tam ber chu kaw-chhung lam tha lo an ni a, hengte hi zu, thin tha lo, pumpui na leh a dangte niin thihna zawng zawng atanga chhutin kaw-chhung lam tha lo vanga thi hi 19.5% a tling a ni.

Chhinchhiahna atanga a lan danin circulatory system chu thihna thlentu pahnihna a ni a, hengte hi thisen sang, lung tha lo leh a dangte an niin hei hi a pumpui atanga chhutin 15.9% a tling a, pathumna chu natna hrik vanga thihna niin HIV, septicemia leh malaria te an ni a, 15.2% a tling bawk.