Aizawl; Nikum 2021 chhunga Mizorama thihna thlentu tam ber chu thin (liver) lam tha lo a ni a, hemi vanga thi chhinchhiah chu mi 578 niin hei hi mitthi zawng zawng atanga chhutin 15.5% a tling a ni.

Directorate of Economics & Statistics in Mizoram chhunga damdawi in hrang hrang (sawrkar, private, UPHC, CHC, PHC leh tualchhunga thi leh piang chhinchhiahtu ‘RBD’) 112-te report a lakkhawma doctor-ten damlote thih dan an chhinchhiahna ‘Medical Certification Causes of Death 2021’ tar lan danin nikum chhung khan damdawi in hrang hrangah mitthi 3,736 chhinchhiah a ni a, heng zinga 2,415 chu mipa an niin hmeichhia 1,321 an awm bawk.

Doctor-te chuan thin tha lo kaihhnawihah hian thi mi 578 awmin a sang ber niin an chhinchhiah a. Thin tha lo vanga thi an tam chhan hi zu kaihhnawih vang te, toxic, hepatitis, thin ro (cirhosis) te niin an tarlang.

Thisen zam tha lo vanga thihna (circulatory system) chu pahnihna niin he natna vang hian mi 563 an thi a, hei hi mitthi zawng zawng atanga chhutin 15.1% a tling a ni.

Circulatory system hian thisen sang te a huam tel a ni. Pathumna chu kum danga la awm ngai lo Covid-19 niin Covid vanga thi hi 390 chhinchhiah a ni a, hei hi mitthi zawng zawng atanga chhutin 10.4% a tling a ni.  A sang zual dangte chu Neoplasm (cancer) leh thawkna lama harsatnate a ni a, cancer vanga thi hi 375 ((10%) awmin thawkna lama harsatna tawk hi mi 367 (9.8%) an awm nia tarlan a ni bawk.

District hrang hrang zingah Aizawl district ah thi an tam ber a, mi 2453 an thi nia report a niin heng te hi mipa 1579 leh hmeichhia 874 te an ni a. Lunglei chu pahnihna niin mitthi 275 chhinchhiah a ni. Hnahthial district chu thi tlemna ber niin mitthi 25 chhinchhiah a ni a, heng te hi mipa 15 leh hmeichhia 10 an ni.

ZALEN zawhna chhangin Economics & Statistics department thawktute chuan tuna damdawi in a thi an chhinchhiah chhungah hian damdawi in pawna thi mi 100 vel an awm tel niin an sawi a. Damdawi in ni lova thi te thihchhan chu hriat a harsa thin tih sawiin, "Doctor te hi an fimkhur avangin an thihchhan an ziak tha duh meuh lo a. Court case neih te an hlau deuh nia a lan avangin chhuanlam siam an awm thin a. An thihchhan hi ziak se chuan kan data pawh hi a rinawm lehzual ngei ang," tiin a sawi.

Kum 5 chhunga MCCD thih dan
Kum              2017    2018    2019    2020    2021
Mipa             2062    2149    2125    2180    2415
Hmeichhia    972      1131    1317    1138    1321 
Total             3034    3280    3442    3318    3736