Aizawl: ZPM leader Lalduhoma chuan,, “Kum 2018 leh AMC inthlan 2-na kan ni ve ve a, final kan thleng tihna a ni. Inthlan lo awm leh tur kum 2023-ah chuan mipui beisei ber kan ni a, Pathian zarah kan sawrkar ngei turah kan ngai," a ti.

Serchhip Block ZPM huam chhunga ZPM unit, Zonu leh Thalai Unit ten New Serchhip Venglai YMA Hall-a Political Training nimina an neihah he thu hi sawiin Lalduhoma chuan, “ZPM chu kalphung hrang nei kan ni a, kan danglam bik tur a ni. Mite pawh kan lakah an thikthu a chhe bik em em a, party dangten an tih, mipuiin an nuih liampui mai mai ang chi hi keini lakah chuan an nuih liampui ve thei lo, hengte hi huat tur a ni lova, an lakah beiseina sang tak an neih vang zawk a ni tih kan hriat a tul a, kan mimal nun pawh kan uluk a ngai zual bik a ni,” a ti a.

MLA atanga ban chungchang sawiin, “A ZPM lutuk tih kha min ban chhan ber a ni mai a. ZPM-ah hian rinawm taka awm turin tawngkam leh ziakin thu ka tiam a, ka thutiam ang ngeiin tun thleng hian ZPM hi ka la phatsan lo a ni. Min bantute hnenah pawh he thu hi chiang takin ka sawi lawm lawm a, min ban lui ta tho a. A nihna takah chuan sawrkar khalh ngil tura Assembly House-a ka thut ve kha an phal lo a ni ber mai,” a ti bawk.