Aizawl: Anti Corruption Bureau (ACB)-in criminal case ziah luh an neih an chhui zawh tawh ah, tunhnai kum thum (2018-2020) chhung in thubuai 11 a eirua puhte thiam loh chantir an ni.

ACB hotute hnen atanga ZALEN thudawn danin kum 2018 khan preliminary enquiry paruk an dawng a, thubuai ziah luh (regular case register) 7 an nei a. Complaint dawn zat aia thubuai ziah luh tam zawk chhan chu kum hmasa lam a complaint lut ziah luh tel a nih vang a ni. Hemi kum hian ACB-in thubuai an chhui zawh, thubuai panga a eirua puh te court in thiam loh chantir (convicted by court) a nei a. Court in thiam a chantir leh chhan dang vanga tih tawp thubuai 7 a awm.

Kum 2019-ah preliminary enquiry 13 dawng in, thubuai ziah luh 2 an nei a, thubuai panga a ei rua puhte thiam loh chantir an awm a, court in thiam a chantir leh chhan dang vanga tih tawp thubuai 6 a awm.

Nikum 2020 chhung khan ACB-in preliminary enquiry pariat ziah luh an nei a, regular case erawh ziah luh an nei lo. ACB-in criminal case an ziah luh an chhui zawh tawhah kum 2020 chhung khan court-in thutlukna pathum a siam a, thubuai pahnihah eirua puh ten thiam an chang a, thubuai pakhatah eirua puh thiam loh chantir an ni. Eiru a puh thiam loh chantir thubuai pakhatah hian mi 10 hming a lang.

ACB in complaint an dawnte hi complaint re-gister-ah a kal zel dan tur ziakin dah vek a ni a, tawngkaa complaint an dawnte pawh ziakin an dah zel thin. ACB a complaint thehluh reng reng hi confidential vek a ni a, ACB investigation leh enquiry te hi RTI hmanga dilchhuah theih a ni lo.