ZALEN July 24, 2024 : Mizoram chuan kum nga kalta (2018-19 to 2022-23) chhung khan investment project thar atan Cheng Vaibelchhe 7118 an neih thu a puang a, Vaibelchhe 320 man project zawh tawh a ni a, Thawh tura ruahman kal mek leh thawh zawh mai tur project Vaibelchhe 1,33,078 man hu nei tur dinhmunah a ding tih chu Micro Small and Medium Enterprises (MSME) Export Promotion Council leh Confederation of Organic Food Producers and Marketing Agencies (COII) ten an zirchianna atanga an hmuh a ni.

MSMEs leh COII ten “PROGRESSIVE MIZORAM: PRESENTS NEW VISTAS OF OPPORTUNITIES 2018-19 to 2022-23" tih thupui hmanga zirchianna an neih chu vawiin khan MSME EPC chairman Dr D S Rawat chuan a tlangzarh a. Tlangzarhna hunah hian Rawat chuan, "Heng project avang hian Mi 30,000 ten hna an hmuh phah angin a sawi thei a, heng project la zawh lo te hi zawh a nih hunah chuan mi 50,000 velin hna an hmuh belh thei turah a ngaih theih a ni," a ti.

Mizoram chuan tualchhung hmasawnna leh tourism hmasawnna tur hawi zawngin hmathlir a nei a ti a, eizawnna nghet neih theih nana hmalakna chu kalpui a nih thu a sawi.

State economy chu beisei phak bakin tualchhunga eizawnna leh service sector lamah a thang tih sawiin Dr. Rawat chuan, "2022-23 khan service sector te thanna hi a sang hle a, Gross State Value Added (GSVA) chu 50.08% lai a ni a, industry hi 25.09% a nih laiin private sector hnuaia agreiculture leh a kaihhnawih te sum lakluh chu 24.83% a ni. 2023-24-ah phei chuan service sector hi lian zual tura ngaih a ni a, hetiang lamah hian hmalakna a nasa hle a ni," a ti.

Dr. Rawat chuan state mipui tam zawkin sum lakluhna atana an hman chu agriculture a nih avangin hemi kawnga lakluh chu nasa taka a than a ngaih thu a sawi. Agriculture, forestry leh fishing te chu a thang niin a sawi a, 2011-12 -ah khan 20.12% a nih laiin 2021-22 kha chuan 24.93%-ah a kai tih a sawi. 2020-21 Gross State Value Added (GSVA) atanga a lan dan chuan Lo neih leh a kaihnawih atanga sum lakluh hi 25.93% a ni a, Industry sector hi 26% niin a dang atanga sum lakluh hi 48% a ni. 2012 khan Mizoram per capita income hi Rs.1,75,896 a ni a, hemi hma kum chiah khan kum khat chhunga mi pakhatin a lakluh hi Cheng 1,79,503 anga chhut a ni.

Zirchianna atanga an hmuh danin 2021-22 khan bank atanga hlawkna hmuh hi Cheng Maktaduai 59821.6 a ni a, agriculture -  maktaduai 5593.7, industry - Maktaduai 4683.8, transport operators - Maktaduai 1299.3, professional & other services -  Maktaduai 3210.0, personal loans - Maktaduai 38631.8, trade - Maktaduai 5924.4, finance - Maktaduai 14.6 leh thil dangah Maktaduai 463.9 te in hlawkna a kai chho bawk. Mizoram-in 2020-22 a hlawkna a hmuh hi Maktaduai 50633 a ni tih chu an zirchianna atanga an hmuh a ni.

Dr. Rawat chuan Mizoram chu tlangram chhengchhia a tam avangin inkalphawna lamah harsatna a awm a ti a, Industry lian dinna chi a nih loh thu a sawi a, MSME chuan hmathlir thui tak neia mi ten hna tam zawk an neih theihna tura hma an lak tur thu a sawi. Chutihrualin industry tenau - bamboo and forest based, processing of plantation crops, food processing & organic farming, handloom & handicrafts, textile based, farm sector, animal husbandry, animal feed and poultry feed industries, tourism & hospitality, sport & sports related services, sericulture & silk industries leh mines & minerals tualchhung mi ten an buaipui chu thlahthlam a nih loh tur thu a sawi bawk.