Aizawl: Kum 7 kalta chhung khan kangmeiin Mizorama a thil a tih-chhiat hlut zawng chu Rs. 47,62,02,461 a ni a, kumin chhunga a tihchhiat hlut zawng chu Rs. 2,47,03,000 a ni.
Fire & Emergency Services department chhinchhiah danin kum 2012 atanga 2018 inkar chhung khan in kang tum 574 leh ramkang tum 788 an chhinchhiah a, kumin thla 2 chhungin in kang 13 leh ramkang tum 25 an chhinchhiah bawk a, heng te hi January ah in kang 5 leh February-ah 8 bakah ramkang January-ah 9 leh February-ah 16 te a ni. Kangmei vanga thi hi kum 7 kalta chhung hian mi 27 an awm a, hengte hi kum 2012-ah 9, 2013-ah 3, 2014-ah 8, 2015-ah 5 leh 2016-ah 2 te an ni a. Kum 7 kalta chhung vek hian kangmei vanga hliam mi 58 an awm bawk.
Fire & Emergency Services department chhinchhihna atanga a lan danin kum 2012 kha kangmei vanga thil tihchhiat a tam ber kum a ni a, hemi kum hian in kang 162 leh ramkang tum 114 chhinchhiah a niin kangmei thil tihchhiat hlut zawng hi Rs. 18,60,68,350 a ni a, hemi kum hian kangmei vanga thi mi 9 leh hliam 16 an awm bawk. Kum 7 kalta chhunga kangmei vanga bungraw kangral a tlem ber kum chu 2018 a niin hemi kum hian inkang 37 leh ramkang 56 chhinchhiah a ni a, kangmei tihchhiat hlut zawng hi Rs. 9,24,33,637 a ni a, thi awm lovin hliam erawh 14 an awm thung. Kuminah hian kangmei vanga thi leh hliam report an la awm lo.
&&&&&