Aizawl; Mizoramah tun hnai kum kua (9), 2015-2023 chhungin lirthei chesual (accident) a thi mi 537 zet an awm a, lirthei chetsual chhan tam ber chu tlan chak vang leh driver fimkhur tawk loh vang a ni.

CID (Crime) hotute hnen atanga ZALEN thudawn danin Mizorama lirthei chesual tam ber chu LMV (car/taxi/van) an ni a, hetihlai hian nikuma lirthei chesual tam ber chu two wheeler a ni thung a, two wheeler chesuala thi hi nikum chhung khan an tam ber bawk.

Kum 2015 atanga kumin thlenga lirthei chesual a thi mi 537 zinga 99-te chu hmeichhia an ni a, mi dang 438-te chu mipa an ni.

Hemi hun chhunga lirthei chesuala thi tam ber kum chu 2022 niin mi 113, mipa 98 leh hmeichhia 15 an ni.

Lirtheia chetsualna a thlen lohna turin hmalakna hrang hrang neih a ni thin a, chung zinga langsar zualte chu - traffic police-te hmalaknain college, school, driver association leh kohhran level-ah te inzirtirna neih thin a ni.

Heng bakah hian lirthei kaihhnawih dan bawhchhiate endikin man thin an ni bawk a, document fel lote pawh uluk taka enfiah thin a ni a, a tul dan azirin mobile checking, special drive leh no tolerance drive te neih thin a ni.

Dan bawhchhiat azirin District Transport Officer (Licensing Authority) hnenah an driving license suspend tura thawn thin a ni bawk.

Kum    Mipa    Hmeichhia     Total
2015    42        16                    58
2016    54        12                    66
2017    45        15                    60
2018    34        11                    45
2019    47        1                      48
2020    34        8                      42
2021    46        10                    56
2022    98        15                    113
2023    38        11                    49
Total    438      99                  537