Aizawl January 28, 2023 : Mizoramah hmunphiah thar a hun chho mek a, hetih lai hian kum dang aiin a man a tlahniam mek.

ZALEN thudawn danin hmunphiah thar hnem berte zinga mi, Vairengte Aitlanga a chingtute chuan an hmunphiah chinte an hralh hun a thleng tan a, kum dangah chuan hnam dang sumdawng (mahaldar)-ten a hrin laiin kg-ah Rs. 40-tein an lei/kharchhawng thin a, tun dinhmunah chuan kg-ah Rs. 25-in khar an tum mek a ni.

Kumina hmunphiah rate hi kum dang ngaihtuah chuan a tlakhniam ber pawl kum a ni mek a, hei hi a chhan chiang taka sawi har deuh mah se, sawrkarin hmunphiah man (minimum price) a bithliah vang nia ngaite pawh a chingtu lamah an awm.

Hetihlai hian Vairengte Aitlanga huan neite chuan harsatna awm loin ramri-ah an hmunphiah hmunah hna an thawk thei a, Assam police duty azirin boruak erawh danglam thei reng a ni tih Vairengte atanga thudawnnate chuan ZALEN an hrilh.

Mizoram sawrkar chuan kuthnathawktute tan tax holiday a puang a, chung zingah chuan hmunphiah hralhnaa chhiah lak thin, royalty pawh tih tawp a. Hemi chungchang hriattirna pawh hi tihchhuah tawh a ni.