Kum khat chauh hun nei tawh Gujarat CM leh a cabinet bâng

Admin - Sep 12, 2021

Karnataka leh Uttarakhand-ah pawh an ti

Karnataka leh Uttarakhand angin

BJP hian kalphung mawlmang leh holam taka lang an nei a, chu chu hruaitute inkarah ‘eng emaw’ a awm chuan inthlak mai an kalpui mai zel a. Hetiang hi tun hnai lawkah pawh Karnataka leh Uttarakhand-ah pawh an ti.
    July thla khan BS Yediyurappa chu Karnataka chief minister atangin a bâng a, hei hi amah leh a fapa lakah an party mite an lawm loh vang a ni ber a. Party chhunga mi thenkhatin an party state unit chief atanga paih tura an ngen angin a laipui lama an hotute thuin a chawl a ni.
    Karnataka hma hian Uttarakhand-ah pawh tum hnih a thleng a. Trivendra Rawat-a chu an hotu liante thu anga chief minister atanga a chawlh hnuah amah thlaktu, Tirath Singh Rawat pawh thla li chang chang chauh a ni hman tihin chawlhti r ani leh bawk.
    Gujarat pawh hi Uttarakhand-a thil thleng ang deuh bawk a ni thei dawn a. Nakum maiah  state inthlan an hmabak dawn a ni.
    Trivendra Rawat leh Tirath Singh Rawat pawh khan an state inthlan hma thla ruk vel a la awm chhunga siksawiu an ni a. BJP hian thuneihna an chan zui theih nan hetiang thutlukna lian tak tak hi an siam thin.

Vijay Rupani chu Gujarat chief minister a nihna atangin Inrinni khan a bâng thut a, a kaihhruai sorkar hian Prime Minister Narendra Modi-a chawr chhuahna state-ah hian kum khat awrh chauh hun an nei tawh.

“PM Modi-a kaihhruaina hnuaiah kum nga chhung Gujarat hmasawnna kalpui a ni a. Tunah chuan hmasawn zel turin, tha leh chakna tharin kalpui a ni ang a, chief minister atangin ka bâng a ni,” tiin Rupani chuan a sawi niin news agency ANI chuan a tar lang.

“BJP chu kan hriat than angin, a tul a nih chuan inthlak kalpui \hin a ni a, hei hi kan party danglam bikna pawh niin worker tupawhin a tih tur chu a zawng zawnga tih theihna an nei a, kei pawh a hma ang bawkin party tan ka thawk zel ang,” a ti.

Rupani-a a bân hma hian a cabinet an lo bâng tawh a. BJP hian he state-ah hian duhthlan tur pathum - an aiawh tur (cabinet thar) ruat, President’s Rule-a awm leh a hun hmaa assembly inthlanpui neih mai chu thlan tur an nei.

A hun hmaa inthlan huaihawt mai emaw, hruaitu, chief minister leh a thuihhruai thar ruat emaw chungchangah party hian thutlukna erawh a la siam lo.

Mi thenkhat chuan July thla maia union health minister atana lak luh, Mansukh Mandaviya emaw, Deputy Chief Minister Nitin Patel te chu Rupani thlaktu turin an sawi ri.

Mandaviya-a hi Gujarat-a Bhavnagar-a piang a ni a, an state atanga Rajya Sabha MP a ni mek bawk a. Rupani-a hi a chenna ina hmu turin a kal tawh nia sawi a ni bawk.

Rupani-a a bâng ta hi an party laipui lama hruaituten a chet dan an duhkhawp loh vang a ni ber a, hetianga tih hi BJP-in an insiam thatna tura an hmanrua niin an state-a an party a him lo deuh dawn nia a lan chuan hruaitu inthlak hi an kalpui mai \hin nia sawi a ni.

Hetiang kalphung hi mawl tak niin ‘state chhunga hruaitute inkarah inrem lohna a awm chuan rang taka lak chhuaha chin fel’ tih a ni a. Karnataka leh Uttarakhand-ah pawh an lo ti tawh nghe nghe.

Rupani-a leh a thuihhruaite an bân chungchangah hian eptu party liante chu an la tawng chhuak hlawm lo va, Congress leh Aam Aadmi Party pawh a ngawi zingah an la tel a. Hetih lai hian independent MLA Jignesh Mevani chu a tawng chhuak tawh thung.

“Gujarat CM Vijay Rupani a bâng: Gujarat mipuite chuan Covid-19 vanga harsatna thleng a hmachhawn thiam loh avangin Pu Rupani-a a bâng hi an lawm ang. Hetianga thil tih hi 2022 assembly inthlan thlir chunga chetna a ni tih a chiang hle,” tiin Twitter-ah a tar lang.

Kum 65 mi, Rupani-a hi December, 2017 khan a vawi hnih nan Prime Minister Modi, Home Minister Amit Shah leh BJP chief minister tam tak awm laiin chief minister atana lak luh kha a ni.

Share now