Aizawl; Kum 2013-2014 chhung in Mizoram ah thisen unit 22226 lak a ni a, heng zinga 20699 chu a thlawn a pek (voluntary donation) niin hei hi thisen pek zawng zawng atanga chhutin 93.13% a tling. Nimin 'World Blood Donor Day' hmanna Chanmari YMA Hall a neih ah Association for Voluntary Blood Donation a General Secretary C.Lalnunnema chuan he thu hi a sawi a. Thisen pe zinga 7495 chu kohhran thalai te pek a ni a, zirna in hrang hrang te pek 3771, YMA member te pek 2451, mimal pek 3862, pawl dang (sipai, group etc.) pek 2794 leh thisen rulh (replacement donation) 1527 te an ni. 'World Blood Donor Day' hmanna inkhawm -a khuallian Health Minister Lal Thanzara chuan, "Midangte nun chhan theihna leh an tan malsawmna kawng awlsam tak chu thisen pek hi a ni a. Thisen unit khat hi a mamawhtu tan chuan thih leh dam kar hriltu a ni," a ti. Mi hrisel tan thisen pek a hlauhawm loh tih sawiin Minister chuan, "Mithiamte chuan thisen pe thinte hian lung natna (heart attack) an vei theihna 88% in a tihniam thei a, cancer vei theihna chance pawh an nei tlem zawk niin an sawi a ni," a ti bawk. Health Minister hian thisen mamawhtute hnen atangin a buaipui man lak a ni tawh dawn tih a sawi a. Hei hi thisen man a nilo tih sawi nawnin mipuite senso hi Health Care Scheme leh Medical Reimbursement-ah a bill let theih dawn a, a tul dan angin National Health Mission sum pawh hman a ni dawn tih a sawi bawk.

State Blood Transfusion Council thuchhuak angin thisen mamawhtu ten blood bag leh a buaipuina (processing) fee, unit khat zelah Rs. 500 an chawi a tul tawh dawn a, hei hi NACO in inkaihhruaina thar a siam anga tih tur a niin a taka hman/ kalpui hun tur hriat a ni hrih lo. Thisen unit khat buaipui nan hian Rs. 1200 vel an seng thin niin MSACS thawktute chuan an sawi. World Blood Doner Day hi Blood group hmuchhuaktu Karl Landsteiner piancham June 14 ah kum 2004 atang khan hman tan a ni a, Mizoram ah chuan kum 2007 atangin hman a ni. Mizoram ah chuan 1993 atangin Aizawl Civil Hospital ah a thlawna thisen pek (voluntary donation) tih tan a ni a, a tira voluntary a thisen pe zat chu 1.80% an ni. Tun dinhmunah Mizoram district khawpui tin damdawiin 8 bakah Synod leh Serkawn damdawiin ah te blood bank a awm tawh a ni. Kumin World Blood Donor Day thupui atan hian 'Save blood for saving mothers' tih hman a ni. AVBD in kum 2013-2014 chhunga thisen pe tha, category a thena lawmman la te

Educational Institution 1. Pachhunga College NSS Unit 312 2. Hrangbana College NSS Unit 187 3. Govt. Aizawl College NSS Unit 178 YMA 1. Chanmari West Branch Unit 192 2. Ramthar Branch Unit 158 3. Ramhlun 'N' Branch Unit 131 Kohhran 1. YEF, Kohhran Thianghlim Unit 325 2. TKP Aizawl Coordination Unit 224 3. PYD, Mizoram UPC Unit 127 Miscellaneous 1. Mizoram EPL Fans Club Unit 161 2. Special Report Fb Group Unit 61 3. Adventure Club, Inter College Unit 48