Rafael Nadal chu inhliam vanga kum khat dawn a chawlh hnuah pawh a lo la thiam reng mai a, mi mala intihsiaknaa a inlan leh hmasakna ber, Brisbane International-ah Thawhlehni tlai khan Dominic Thiem a hneh nghal.

Kum 37 mi hi ni 349 zet liam taa Australian Open second-round-a a chak loh leh hnua maltana a inkhelh leh hmasak berna niin 7-5 6-1-in hnehna a chang.

Grand Slam champion vawi 22 zet ni tawh hian tun season lo awm tur hi a hun hnuhnung ber a nih theih thu a lo sawi lawk tawh.

Wildcard Nadal hian Australian Open khelh ngei a tum a. Kum khat chhunga Grand Slam hmasa ber hi Melbourne-ah January 14 atangin tan a ni dawn.

“Vawiin zet chu a lungchhiatthlak zawk a ni,” tiin a chak hnuah Nadal hian a sawi a. “Tennis ka khelh ve tawh chinah kum harsa ber a tling,” a ti.

“Inkhelh hma khan ka zam a, hun rei tak hnuah a nih avangin ka inringhlel a; mahse, tha taka thil kalin ka lo kir leh hi ka hlim a, ka phur tak zet a ni,” a ti bawk.

Nadal-a hi maltana a inkhel lai khawvelin a hmuh hnuhnun ber chu 2023 Australian Open-a hliam nei chunga Mackenzie McDonald a hneh loh tum kha a ni daih tawh.

June-ah a khel vei lam zaisak a ni ta a, ranking-ah pawh tawlh hnung char charin No. 672-na daih a ni tawh.

Inelnaa a inlan leh hmasak ber chu Pathianni kha niin Brisbane tournament-ah hian a hnampui, Marc Lopez tangdunin Australian pair Max Purcell leh Jordan Thompson an hmachhawn a, an tlawm. Ni hnih hnuah maltanah a inlan zui leh ta a ni.

2020 US Open champion Thiem-a laka hnehna a chan chiah hian a hmelah a lawm tih a hmuh theih a, a ban pahnih pharin mipui lamah lawmthu a sawi bawk.

A hliam avang khan May thlaah khan kum 19 chhunga a vawi khat nan French Open a khelh dawn loh thu a puang a, kum 2024 hi a inkhelh hnuhnung ber kum ‘a nih theih thu’ a sawi bawk.

Pathiannia doubles-a a inlan leh hnuah erawh kha chuan khelh zel a la châk thu a sawi leh tawh a, tun season tawpa chawlh chu a chian dan ‘a zaah za lo’ niin a sawi.

A inhliam chhung hian Nadal-a hi Novak Djokovic-a’n Grand Slam nomawi lak tamah a umpha a, a hnuah French Open leh US Open a lak leh bawk avangin 24 lai a la tawh a ni.