ZALEN Feb 16, 2026: Vawiin chawhma dar 11 khan ZPM chuan General Headquarters Office-ah chhung inkhawm an nei a, Richard Vanlalhmangaiha, MP (LS) chuan thu sawiin, “ZPM kan vanduaina chu, kan sawrkar laia opposition-te hi constructive opposition ni lovin destructive opposition an ni a, kan thil tih that an hmu thei miah lo a, chu pawh dawt hmangin a ni a, rei lo tea hai lan a ni leh zel thin a ni,” a ti.

MP chuan, “Kum khat leh a chanve chhunga Central-a kan achievement han sawi ila:-

(i) Nikum khan Post-Matric Scholarship vbc 50, nuai 42, sing 8, sang 1 kan pawt chhuak a. 

(ii) National Highway – 44, hmana tender tawh, hmana thawh daih tawh chu; a hna thawktuin a thawk chhe lutuk a, an cancel tawp mai a, chuta pawisa bang la awm (balance work) chu vbc. 170 leh nuai 96 a ni. 

(iii) ‘One Time Improvement’ National Highway - 44 tho hi vbc. 48 leh nuai 63 a ni. 

PBMC (Performance Based Maintenance Contract), Bairabi atanga Bilkhawthlir inkar khu vbc. 38, nuai 73 a ni. 

(iv) PBMC tho, Lawngtlai to Zochachhuah saw vbc. 109, nuai 93 a ni.

(v) PBMC bawk, Champhai leh Zokhawthar inkar khi vbc. 28, nuai 95 a ni. 

(vi) One Time Improvement, Champhai leh Zokhawthar inkar, National Highway – 6 khi vbc 9, nuai 85 a ni a. 

Tichuan, a vaiin vbc. 457, nuai 47, sing 8, sang 1 hi tun kum khat leh a chanve chhung hian kan pawt chhuak ve a ni,” a ti.

Mizoram Universal Healh Care Scheme (MUHCS) tha a tih thu sawiin Richarda chuan, “Kan state sawrkarin health care scheme tha tak a nei a, Pathianin kan hotute finna a pe a, health care scheme tha tak kan nei a, la zawm lote pawhin i zawm vek ang u,” a ti a. Tun laia thil lar tak, Vikshit Bharat chungchang sawiin, “Kum 2047 hian India hian kum 100 a tling dawn a, tunah hian developing country kan ni a, kum 100 kan nih meuh chuan Central Sorkar hian India hi Developed Country-ah min hlan kai a tum a ni. Chu vang chuan Sorkar a inbuatsaih nasa a, nakinah phei chuan Vikshit Bhrarat hi an la sawi nasa tulh tulh dawn a. India ram zawng zawng hi he Policy hian a huam a ni tih hria ila. Chumi policy-a an kalpui thil pakhat chu ‘cashless’ hi a ni. Tute emawin, ‘ZPM sawrkar hnuah pawisa a vang,’ te an tia, min beih nan te an hmang a. ZPM sawrkar vang a ni lo, hei chu Central policy a ni. Cashless hi an kalpui zel dawn a, 2047 hmaa pawisa note zawng zawng hi tihbo vek an tum a ni. Chu chu India policy a ni tih hria ila. Chu chu a thatna em em chu pawisa print nan hian mi tam tak an ruai a, khawl nen, kha khan hna a titam. Tin, pawisa lem a awm thei tawh dawn lo a ni,” a ti bawk.

#ZalenNews