Aizawl July 28, 2024 : Kum li kalta, 2021 kum atanga July 15, 2024 thlenga African Swine Fever (ASF) vanga sum hloh chu Rs. vaibelchhe 707.96 a tling tawh a. State disaster calamity-a puang turin thuneitu sang hnenah thlen tum mek a ni.

Animal Husbandry & Veterinary Department chhinchhiah danin vawk natna chi khat hi kum 2021 khan Mizoramah hmuh tan a ni a, he hri hmuhna hmasa ber chu Lungsen khua, Lunglei district a ni a. Kum 2021 hian vawk 33,417 thiin 12,568 suat a ni a, khaw 272 nghawngin hemi kuma ASF vanga sum hloh hi Rs. vaibelchhe 334.14 nia chhut a ni.

Kum 2022 khan ASF vang hian vawk 12,795 thi lehnin 11,686 suat a ni a, khaw 149 nghawngin sum hloh hi vbc. 210.32 a ni a. Kum 2023 khan vawk 1,130 thi lehin suat 980 a awm a, khaw 36 nghawngin hemi kuma sum hloh hi vbc.15.77 a ni a. Kumin January atanga July 15 thleng khan vawk 6,001 thi tawhin 11,380 suat a ni tawh a. Kuminah hian khaw 168 tuamin sum hloh hi vbc. 147.73 nia chhut a ni.

AH & Vety department chhinchhiah danin kum 2021 atanga July 15, 2024 thleng khan ASF vang hian vawk 53,352 a thi tawh a, 36,614 suat a ni tawh bawk a, ASF kaihhnawiha vawk thi zawng zawng hi 89,966 an ni a. Khaw 625-a chhungkaw 22,608 nghawngin sum hloh zawng zawng hi vaibelchhe 707.96 a tling a ni.

ZALEN thudawn danin ASF vanga kuthnathawktute sum hloh hi a tam tham em avangin AH&Vety department chuan chhiatna (calamity)-a puang turin thuneitu sang hnenah thlen an tum a. Department ngenna hi a hlawhtlin chuan vawk chânten zangnadawmna an hmu thei dawn a ni.

Tun dinhmunah chuan ASF hi calamity-ah puan a nih loh avangin vawk vulhtuten an vawk an chân a nih pawhin zangnadawmna leh chhawmdawlna an hmu thei lo a ni.

1. ASF hi vawk natna chi khat niin kum 2018 khan China-ah hmuh a ni a, vawk maktaduai 400 chuang an thi.

2. Kum 2019-ah Myanmar-ah hmuh leh niin sawrkar chuan thenawm Myanmar atanga vawk lakluh a khap nghal a. India ram state zingah Myanmar atanga vawk lakluh khap hmasa ber a ni.

3. Kum 2020 khan hmarchhak biala a hmasa ber atan Arunachal Pradesh leh Assam-ah hmuh a ni a. Mizorama hmasa ber atan kum 2021 khan Lungsen khuaah hmuh a ni.

4. Pachhunga University College a Department of Economics-in an zirchiannaah kum 2021-a ASF leng vang khan Mizoram mipui 19%-in zirna an chhunzawm thei lo a, 24%-in Farming chhunzawm thei lovin 8.3%-in In sak an chhunzawm theih loh phah a ni.

5. Kumina ASF hri hmuhna hmasa ber chu Leithum, Champhai district niin February 9, 2024 khan hmuh a ni.

6. Kumin January atanga Zirtawpni (26.7.2024) thleng khan Mizoramah ASF vanga vawk thi 7,558 awm tawhin ASF vei nia rinhlelh vawk 13,850 suat a ni tawh a, khua 191 a tibuai tawh a ni.