Aizawl: Kum thar, 2023-2024-a Mizoram êng chhit man chu tihsan a ni lo a. Kum 2023-2024 chhunga Mizoramin kawlphetha a hman tur chu 512.58 million units vel ni tura chhut a ni.

Kawlphetha hman man bithliahtu, Joint Electricity Regulatory Commission for Mizoram & Manipur chuan kum thara êng chhit man tur hi March 28 khan a bithliah fel a, April 1, 2023 atanga hman turah tuna rate hman lai ang chu la tha tawkah ngaiin tihsan ni lo se a ti a ni.

Power & Electricity department-in kum 2023-24 chhung atan Aggregate Revenue Requirement (ARR) leh tariff bithliahsak commission an dilna chungchang hi March 20, 2023 khan Mizoram State Advisory Committee meeting-ah sawiho a ni a. Mizoram State Advisory Committee chuan tariff sang taka tihsan loh theih se a duh a. Tariff tihsan dilna chungchangah hian March 22, 2023 khan Aijal Club-ah public hearing neih a ni a. Hetah hian mi mal leh pawlho atanga rawtna leh sawiselna siam pali zinga lo tel pathumte leh P&E Department-in an chhannate ngaihthlak a ni.

P&E Deptt hian kum 2023-24 chhunga power supply enkawl nana Revenue sum mamawh (ARR) Rs.782.33 Cr bituk sak turin Commission an dil a, hemi hmuchhuak turin tuna tariff hman lai hi 3.15%-a tih san a, sum mamawh tlin phak lohna awm chu Mizoram sorkarin subsidy Rs.157.90 Cr emaw Commission-in ARR a bituk sak atanga 20.50% emaw, heta a tlem zawk zawk hian a phuhruk sak dawn tih an sawi. 

An dil ang chuan eng chhit man thar tur hi chawhrualin Unit khat man Rs. 8.08 vel tur a ni. JERC hian P&E Deptt sum mamawhna te a zir chian hnuin ARR atan Rs.567.77 Cr a bituk sak a, hei hi kawlphetha hralhna atanga hmuhchuah tur a ni. Commission chhut danin tuna tariff kan hmanlai hmangin leh Electric Vehicle (EV) Charging Station atana rate thar rawtna atangin kumthar 2023-24 hian Rs.406.85 Cr leh kawlphetha hman bang ram pawna hralhna atangin Rs.62.62 Cr an hmuh theih beisei a ni a, hei hi avaiin Rs.469.47 Cr a ni. 

Hei hian Rs.98.30 Cr (i.e, 567.77–469.47=98.30)-in ARR a phuhru zo lova, tariff tih san-a, tariff sanna atangin phuhruk tur a ni. Nimahsela, hei hi sorkarin Rs.98.30 Cr subsidy pe-in a phuhruk sak theih dawn avangin Tariff tih san a tul lova, Tariff hman lai leh category thar (EV Charging Station) atana hman tur rate an rawt hi kum FY2023-24 atan hmang turin Commission-in thutlukna a siam a ni.

Kum thar FY2023-24 chhunga Mizorama-a consumer te kawlphetha hman tur hi 512.58 MU vel a ni dawn a. Tariff kan hman lai mek anga chhutin P&E Deptt.-in kum thar hian consumer te hnena kawlphetha hralhna atangin Revenue Rs.406.85 Cr vela hmu thei ang a, a pumpuia chawhrualin kumthar 2023-24 chhunga unit khat man tur chu Rs.7.94 a ni. Kumin 2022-23 aia kumthar 2023-24 chhunga kawl-phetha hman zat a tam dawn avangin Tariff hi tih san ni lo mahsela, kum thara Revenue hmuh tur hi kumina hmuh tur beisei zat aiin Rs.11.20 Cr-in a tam a ni. 

P&E Deppt.-in kumthar FY2023-24 chhunga consumer te eng pek nan unit khat zelah Rs.11.44 mamawh tura an insawi lain Commission-in ARR a bituk sak atanga chhutin P&E Deptt chuan engpek nan unit khat zelah Rs.9.86 an mamawh. Nimahsela, Sawrkar-in subsidy a pek dawn avangin tlawm zawkin mipui hnenah chawhrualin unit khat Rs.7.94 vel zelin an pe thei dawn ta a ni. Sawrkar-in consumer te subsidy a pek sak tur hi a chawhrualin unit khat-ah Rs.1.92 vel zel ang a ni.

JERC chuan tariff order thar hi Manipur tan pawh a siam a, Manipur-ah pawh sorkar subsidy pek turin ARR tlin phak lohna a phuhruk theih dawn avangin kumina an tariff hi kumtharah pawh hman chhunzawm a ni ang. 

Manipur-ah hian kum thar FY 2023-24 chhunga êng pek nan unit khat zelah Rs.8.19 mamawh a nih lain Subsidised Tariff hi chawhrualin unit khat man Rs. 6.30 a ni a, Mizoramah êng pek nan unit khat zelah Rs. 9.86 mamawh anih laiin unit khat man Rs. 7.94 a ni thung. Manipur-a tariff a hniam zawk theih chhan chu kawlphetha unit khat pek nan an sum mamawh a tlem zawk bakah sorkarin subsidy a pek ve tho vang a ni. 

Kum 2023-24 hian Mizoram-ah consumer 3,01,555 awm tura chhut a ni a. Tuna kawlphetha hman thin dan ang chuan domestic consumer zawng zawng, 2,52,148 zinga consumer 1,34,077 hian thla khat chhungin unit 60 vel hmang awm turin chhut a ni a, unit 117 vel hmang hi chhungkua 65,391 leh unit 200 hmang pel thla khata unit 209 vel hmang hi 39,362 awm turin chhut a ni. KJ consumer chhungkua 45,964 leh HT (High Tension) domestic consumer 24 awm turin chhut a ni.

Kum thar 2023-24 hian Mizoram pawn lam generating station hrang hrang leh Tuirial HEP Generating Station atangin kawlphhetha 750 MU vel lei a tul dawn a, heng atanga leina tur hi chawhrualin unit khat man Rs.4.48 vel zel a ni.

Kum 2023-24 chhungin Mizoramin Transmission loss 2% leh Distribution loss 22.61% te telin kawlphetha 675.89 MU hmang tura chhut a ni a. Kan hman bang 93.80 MU awm thei tura chhut a ni a, phai lamah hralh dan ngaihtuah tur a ni. Mizoram chhunga Transmission leh Distribution-a kawlphetha luang ral tur hi 163.31MU vel a ni.

JERC in public hearing a neihah pawl pathum Mizoram Consumers Union, Mizoram ISPAT Industries leh Zoram People’s Movement bakah Central YMA President hlui Vanlalruata ten ngaihdan an thlen.