ZALEN August 30, 2023 : Kumin kum tawp lama Mizoram MLA inthlanpui loawm turah kum lama upa (senior citizen) te chu in atanga vote an thlak phalsak a ni dawn a. Mahse vote thlak tur te hian hemi atana tul form an thehluh ve a ngai dawn thung a ni.

Vawiin tlai dar 4:30 khan Aijal Club ah chanchinbumite kawmin Chief Election Commissioner Rajiv Kumar chuan he thu hi a sawi a. Mizoram inthlanpui neih hun tur chu la tihchian a ni lo tih sawiin political party te ngenna angin Inrinni leh Pathianni chu a nih a rinawm loh a ti a. Mizoram inthlanpui loawm turah a tam thei ang berin vote thlak se an duh tih sawiin,"Inthlanna thianghlim, fel fai, muanawm leh langtlang a awm ngei ka beisei a ni," a ti a. Inthlan senso zat chungchang zawhna chhangin tuna candidate pakhat senso theih zat chu nuai 28 a ni tih a sawi a, senso hi tisang turin ngenna a awm tih a sawi bawk.

Press mite a kawmina ah hian Chief Election Commissioner Rajiv Kumar hi  Election Commissioner pahnih Anup Chandra Pandey leh Arun Goel te bakah ECI official ten an tawiawm a ni.