April 25, 2022; Sairang Tlawnglui ah kumin 2022 chhungin tuitla hlum mi 4 an awm tawh a, tuitla chhan hman mi 3 an awm tawh bawk. Sairang Branch YMA president C. Sangrotluanga chuan Tlawng kam a eizawngte leh balu la te an tlawmngai hle tih sawiin, nunna pawh an chhan hnem tawh an ring tih an sawi.

ZALEN in biakna ah Sairang Branch YMA president chuan Tlawnglui a balu la leh Tlawng kam a eizawngte chu tuitla an awm leh awm loh bengkhawn a, nunna chhan ngai an awm chuan rang taka che chhuak tur leh an thei lo a nih pawhin rang taka midang pun turin zirtirna an kalpui mek a, chumi atan chuan vengchhung chanchinbu te, khawhar lenpuina hmun te leh hun leh hmun remchang a piangte an hmang tangkai thin.

Sairang Branch YMA president sawi danin, an huam chhung chin Tlawnglui ah kumin chhungin tui tlahlum mi 4 an awm tawh a, an hriat chinah tuitla chhanchhuah mi 3 an awm tawh.

C. Sangrotluanga chuan Sairang naupang leh tleirawl lamin Tlawnglui a chen an intihhmuh tawh lo nia an hriat vangin 'tuihleuh leh tlawmngaihna lamah tan lak a ngai e,' tiin hmalakna an kalpui tih sawiin, "Chumi lamah chuan hma kan la a, tunah chuan naupang lam pawh tui an cheng nasa ve leh tawh a...nunna chhan tur a tlawmngai a chetchhuahna kawngah rah tha a chhuah deuh deuh kan beisei," a ti bawk.

Sairang Branch YMA hian tui tla zawnna hmanraw pawimawh an nei tha tawk lo tih hria in, Aizawl West I bialtu MLA Zothantluangan Scuba diving (tuichhung luhna) leh walkie talkie ngaihtuahsak a tum tih Sairang Branch YMA president chuan a sawi.