ZALEN August 27, 2023: Excise & Narcotics Department chhinchhiah danin kumin kumtir atanga August ni 23, 2023 thleng khan Mizoramah damdawi hmansual vanga thi mi 49 an awm tawh.

Chhinchhiahna atanga a lan danin damdawi hmansual vanga thi 49 zinga 40 hi mipa an ni a, 9 chu hmeichhia an ni thung. Kumin a damdawi thihpui te hi an vaiin No.4 (heroin) kaihhnawiha thi vek an ni. 

Excise & Narcotics Department in kum 1984 atanga an chhinchhiah dan chuan Mizoramah damdawi hmansual vanga thi hi mi 1785 an awm tawh a, an zinga 1571 hi mipa niin 214 chu hmeichhia an ni. END chhinchhiah danin kum 2020 kha Mizoramah damdawi hmansual vanga thi an tam ber kum a niin hemi kum hian mi 67 an thi a ni.