Aizawl April 21 : Kumin January atanga March thla tawp thleng khan Mizoramah in kang 16 chhinchhiah ni tawhin kangmei vangin mi pakhatin nunna a chân tawh bawk.

Fire & Emergency Services chhinchhiah danin kumin thla thum chhung bikah hian in kang 16 leh ram kang tum 33 a thleng tawh a. Kangmei vanga thi pakhat awmin hliam an awm lo thung a. Kangmeiin thil a tihchhiat hlut zawng belhkhawm hi Rs. 6,70,80,332 a ni a, bungraw chhe tur chhanchhuah (salvage) zat chu Rs. 6,03,77,000 a tling.

Fire & Emergency Services chhinchhiah danin kum 2018 khan in kang 37 leh ram kang 56 awmin kangmei vanga hiam 14 an awm bawk a. Kangmeiin thil a tihchhiat hlut zawng hi Rs. 9,24,33,637 a ni a. Kum 2019 khan in kang 28 leh ram kang 16 awmin kangmei vanga thi pathum leh hliam pasarih an awm bawk a. Kangmei thil tihchhiat hlut zawng hi Rs. 1,39,15,930 a tling a ni.

Kum 2020 khan in kang 37 leh ram kang 131 awmin kangmei vanga hliam pahnih an awm a. Kangmei thil tihchhiat hlut zawng hi Rs. 5,22,79,768 nia chhut a ni.

Kum 2021 khan in kang 71 leh ram kang 199 awmin hliam pathum an awm a. Kangmei thil tihchhiat hlut zawng hi Rs. 26,92,60,507 a tling a. Kum 2022 khan in kang 34 leh ram kang 44 awmin hemi kum hian kangmei vanga thi mi 15 lai an awm a, hliam pawh 11 zet an awm a ni.

Kum 2022-a kangmei tihchhiat hlut zawng hi Rs. 23,69,08,000 a tling a. Nikum 2023 khan in kang 31 leh ram kang 149 awmin kangmei vanga hliam panga an awm bawk a. Kangmei thil tihchhiat hlut zawng hi Rs. 3,00,07,800 nia chhut a ni bawk.