Aizawl August 18, 2024 : Mizoram-ah kumin January atanga July thleng khan Malaria vanga thi mi panga an awm a, Chikungunya vei hmuhchhuah mi pathum an awm tawh bawk.

Kumin January atanga July chhung khan Mizoram pumah Malaria vei tawh zat mi 12,290 awmin chung zinga 6,349-te chu PF niin Malaria natna avangin mi pangain nunna chân tawh a. Nunna chânte hi Lawngtlai district mi leh sa vek an ni.

Kumin chhung hian kum dang zawng aiin Malaria PV a pung nia report a ni a, kumin hian Dengue vei hmuh chhuah tawh zat hi mi 267 niin Chikungunya vei hmuhchhuah tawh zat hi mi pathum niin report a ni bawk.

Mizoramah hian district pali - Lawngtlai, Lunglei, Mamit leh Siaha district-te hi Malaria tam zual biknate an ni a, a bikin international border – Bangladesh leh Myanmar ramri hrulahte Malaria hi a tam zual nia report a ni.

National Vector Borne Disease Control Programme (NVBDCP) hnuaiah Malaria natna laka invenna heng: thosilen damdawia chiah sa sem te, thosilen pangngai damdawia chiahsakte leh chenna in chhung thosi hloa kahte kalpui mek a ni.