ZALEN October 27, 2024 : Mizoram-ah sawrkar leh NGO-ten zu leh ruihhlo do beihpui an thlak kal mekah kumin chhungin Rs. 1,82,10,98,111.55 (Vbc. 182.10) hu zu leh ruihhlo halral/tihchhiat a ni tawh a, chung zingah chuan meth/crystal meth a tam ber.

ZALEN-in document a neiha a lan danin kumin chhunga zu leh ruihhlo hal ralte hi police, excise leh Central YMA Kumpuan Committee man a ni a, chung ruihhlo hal ralte chu court-a chin fel tawh, court-in tihral phalna a pek tawhte an ni.

Kumina ruihhlo hal ral zingah hian methamphetamine leh crystal meth a tam ber a, methamphetamine hi kg. 150.242 hal ral niin, chu chu Rs. 19,53,14,600 hu a tling a, crystal meth hal ral zat pawh kg 36.251 tlingin, chu chu Rs. 1,08,75,30,000 hu

a tling.

Kumin chhungin hlawm lian tham a zu leh ruihhlo hal ral/tihchhiatna vawi nga neih a ni tawh a, chunga hal ral/tihchhiat zawng zawngte chu Rs. Vbc. 182.10 hu tlingin, chung zingah chuan excise departmentin an tihchhiat zu chi hrang hrang Rs. 57,15,800 hu pawh a tel.

Hetihlai hian kumin January - October chhungin Mizoramah ruihhlo vanga thi mipa 53 leh hmeichhia pariat, an vaiin mi 61 an awm tawh a, kum 1984 atanga kumin thlengin ruihhlo vanga thi mi 1,871 awm tawhin, chung mite chu mipa 1,644 leh hmeichhia 227 an ni.

ZALEN thudawn danin, NGO (Central YMA) bakah, district hrang hrang police leh excise ten theihtawp chhuahin ruihhlo dona kawngah hma an la chhunzawm mek reng a, thalaite leh mipui hnenah te ruihhlo laka fihlim tura zirtirna (awareness campaign) nasa takin an kalpui a. Awareness campaign hi Mizoram chhunga zirna in hrang hrangah neih thin niin, signature campaign pawh hmun eng emaw zatah neih a ni tawh bawk.