August 26, 2023; Hmeichhe naupang kum tlinglo khuaikhemtua puh Vanhreluaia (30), Champhai Kanan veng chu Sylvie Zomuanpuii Ralte, Special Judge POCSO Act-in thiam loh a chantir a, hrehawm taka kum 20 chhung lung in tang tur leh pawisa Rs. 10,000 chawi turin a hrem.

Vanhreluaia hian kum 2019 June thla khan Champhai khawpui chhung veng pakhata a lenna te fanu kum 5 mi chu zu rui chungin pawn lamah a hruai chhuak a, mipat hmeichhiatna hmanpui tumin a khawih a, hetia a khawsa lai hi naupang dangin hmuin kal sawn tura an tih pawhin a kalsawn duh lo a, naupangte hian puitling zawkte punin Police hriattir an ni a, Police-te hian man in POCSO Act hnuaiah thubuai an siam sak ta a ni.

Nimin khan Sylvie Zomuanpuii Ralte, Special Judge POCSO Act chuan Vanhreluaia puh a nihnaah hian thutlukna siamin thu-hretu hrang hrang leh mita hmutute thusawi atangin court chuan thiam loh a chantir a, hrehawm taka kum 20 chhung lung in tang tur leh Rs. 10,000 chawi turin a hrem a, pawisa a chawi tur hi a pe tla thei lo a nih chuan thla 2 dang a tan belh leh dawn a ni.