Aizawl: Champhai Special Judge R.Vanlalena chuan hmeichhe naupang pawngsualtu Vanlalvena (51) s/o Selvela, Hnahlan Saron Veng chu hrehawm taka dam chhung Jail tang turin a hrem.

Judge thuremna tarlan danin pawngsualtu Vanlalvena hian hmeichhe naupang kum 4 leh a chanve mi chu a chhung ten bawlhlawh paih tura an tir lo hmu fuhin a Inah a lo hruai peng a. A pindanah luhpuiin naupang chu a phelh ruak a, a serh te khawihsakin hmei-chhiat mipatna hmanpui a tum a. He thil hi hmei-chhe naupang chuan sawi mai nachang pawh a hre lo va, hemi ni tlai chaw an ei laiin naupang hian a nu bulah a serh a nat thu a sawi a. A nu chuan naupang serh chu enchiang vatin thil fel lo a thleng ni ngeia ringhlelin a tukah Champhai Police-ah FIR an thehlut nghal ta a ni.

Police chuan pawngsualtua puh hi a man nghal a, hmeichhe naupang pawh hi doctor hnenah kalpui vatin doctor-in a endikna report-ah chuan hmeichhe naupang serh hamda chu a tet a ni tih hmuh chhuah a ni. Police lamin thil tul apiang an bawhzui hnuah he charge sheet chu Champhai Court ah an theh lut ta a ni.

He thubuai a neih hma kum 2017 February thlaah pawh khan Vanlavena hian hmei-chhe naupang kum 6 mi vel chu an khaw thlanmual mawng lamah hruai hrangin khuai khem a lo tum tawh a, thil pawi thui tak erawh a thleng hman lo hlauh.

He thil thlengah pawh hian Champhai police-te chuan an lo man tawh a, Court-ah thawnin jail ah dah luh a lo ni tawh bawk. A hriselna lam that tawk loh vangin Court chuan hun eng emaw ti chhung atan chauh bail-in a lo chhuah lailawk a, hemi chhung hian a thubuai pawh chu court in a rel mek a. Chutih hun chhung chuan thil pawi lian zawk a lo tih leh takah chuan police-te chuan man lehin Champhai Special Court Judge chuan thilsualtitu hi na taka hrem loh theih loh nia hriain hrehawm taka dam chhung Jail tang tur leh pawisa chawi turin hremna thu hi a puang ta a ni.