Aizawl: Chief Minister hova Chapchar Kut organising committee thukhawm chuan Kut neih leh hunah discipline theih tawk a tha a kenkawh ni se an ti.
Chapchar Kut Organizing Committee hi Ningani kalta khan an Chairman Chief Minister Zoramthanga hovin CM’s Conference Hall-ah an thukhawm a, kumin February ni 28 leh March ni 1 chhunga Chapchar Kut lawmna thlirletin he hunah hian Chief Minister chuan kumin Chapchar Kut puala siam Souvenir a tlangzarh bawk a ni.
Meeting-ah hian Chapchar Kut Organizing Committee Secretary hnen atangin kumin Kut hman dan tlangpui ngaihthlak niin Treasurer hnen atangin kut lawmnaa sum senso tlangpui ngaihthlak a ni bawk a.
Kumin Chapchar Kut hi ‘Zofate Inpumkhatna; tih thupuia hmangin Aizawl district-ah chuan Lammuala lawm a ni a. Organizing Committee-in State pawn atanga Zohnahthlakte sawm tur a tih anga sawm niin, Falam atangin mi 5, Tedim atangin mi 5, Manipur atangin mi 4, Haflong leh Karbi Anglong atangin mi 7 ve ve kut chhim in an lo kal a ni. Lammual sirah Food Stall 20 leh Handloom Stall 19 siam niin, Flower show leh photo exhibition te neih a nih bakah Museum a thil dah that te mipui hmuh tura phochhuah a ni a.
A vawikhatna atan sport lama Mizote tihmingthatu mi 3 hnenah chawimawina Nopui hlan a ni. Kumin Chapchar Kut lawmnaah hian Mizoram chhunga district zawng zawng bakah a tumkhatna atan state pawna Mizoram House-ahte pawh hman a ni.
Meeting chuan kut buatsaih leh zel tura hmalak a awlsam zawk nan Chapchar Kut Organizing Committee hnuai-ah Working Chairman atan Art & Culture Minister awm se tiin an rel a, ani hnuaiah hian working sub-committee siam leh nise tiin an rel bawk.