Mizoram MP K.Vanlalvena chuan Rajya Sabha chairman hnenah parliament thutkhawm meka rorel kal pangngai tihtawpa tun laia Manipur-a chi leh chi inkara buaina awm mek sawiho hun hawng tura ngenna a thehlut leh nawn leh.

Ram rorelna in sang zawka Mizoramin MP a neih chhun hian Jagdish Dhankar-a hnena lehkha a thehluhah hian Nilainia rorel inkhawm neih leh turah Rules of Procedure & Conduct of Business in Rajya Sabha-a Rule 267 tlawhchhana rorel kal pangngai titawpna tur thu put luha Rule 29(2)-in a phalsak angin hmarchhak state-a buaina chhuak sawiho tura hun hawn a dil.

Chairman hnena lehkha a thehluhah hian Vena chuan Mizoram thenawm state-a thil thleng mek dinhmunte pawh a tar lang a. “Mi 140 chuang an thi tawh a, mi tam takin hliam an tuar a, himna zawngin mi 50,000 chuang an thenawm state-ah an tlanchhe tawh a, chenna in 5,000 chuang tihchhiat tawh niin biak in pawh 3,000 chuang hal chhiat leh tihchhiat tawh a ni,” a ti.

“Tun thlengin tharum thawhna hi la kal zelin Mizo hnam hmeichhiate pawngsual an ni a, nunauvin nasa takin an tuar mek zel,” a ti bawk.

Rajya Sabha MP hian tun tuma ram rorelna kaltluang lai titawp tura ngenna a thehluh hma hian Zirtawpni khan chairman hnenah a lo thehlut tawh bawk.

May 3 atanga Manipur-a Zohnahthlak (tribal) leh Meitei inkara tharum thawhna thleng hian thla thum dawn a awh ta a. Ram rorelna in sang pahnih, Lok Sabha leh Rajya Sabha-ah chuan eptu MP-ten sawiho phutna an aupui a, ni li chhung chu eptute thil phut avang hian rorel pawh a kal mumal thei lo tawh.

Buaina a chhuah tirh atangin Mizoram MP hi Manipur-a Zohnahthlakte tana aw-ka nei tam ber pawl a ni a. May 9-ah pawh Prime Minister Narendra Modi-a hnenah buaina chhuak chhui chiangtu tur, Joint Parliamentary Team din tur leh hetah hian Kristian MP pawh tel ngei tura a ngenna a lo thehlut tawh.

Tharum thawhna a thlen tan tuk chiah, May 4 pawh khan Union Home Minister Amit Shah-a hnenah lehkha (memorundum) thehlutin buaina chu a hmeh mih dan zawng nghal turin a ti.

Hemi hnuah pawh hian Vena hi Manipur-a buaina tuar, a bikin Zohnahthlakte tan a au nasa hle a. Buaina chin fel dan tha ber chu Meitei leh tribal-te tana inawpna hran neih a nih thu pawh Twitter-ah a tar lang a. Zohnahthlakte thlamuanin, “Manipur-a Mizo hnam peng hrang hrangte hian MP an nei lo emaw an lo inti ang e, kei hi an MP chu ka ni,” tiin a tar lang tawh bawk.

India parliament fur thutkhawm hi Ningani kal ta atanga tan kha niin August 11 thleng a awh dawn a ni.