Mizoram MP K. Vanlalvena chuan Myanmar atanga raltlan zirlai naupangte sikul zirtirtu hlawh a tumpui dawn.

Rajya Sabha MP hian zan thum riakin Nilaini kal ta atang khan Mizoram chhim lam, Myanmar ramri dep khaw thenkhatte a tlawh a. Chhimtawpa raltlan hruaitute nen Chapui khuaa an inkawmnaah raltlan naupangte tan sikul zirtirtu hlawh a tumpui tur thu hi a hrilh a ni.

Vena chuan khaw chhung mite nena an inkarah harsatna awm thei hrang hrangte a sawipui bawk a, “Hmangaih taka lo tuamhlawmtu Mizoram mipuite laka that chhuah let ve chu raltlante tih makmawh a ni,” tiin a fuih bawk.

MP hian Mara leh Lai district-a model village pahnih, Phura leh Pang khua a tlawh bawk a. Khawtlang hruaitute nan Phura khawtlang tih hmasawn dan turte an sawi a, Pang khua chu international trade route pawimawh la ni tur a nih avangin motor kawng sialna tura compensation avanga harsatna awm thinte tihkian a pawimawh thute a sawipui bawk.