July ni 16, 2023: Kolasib MJA chuan Krishi Vigyan Kendra, Kolasib ram, inhmun atana ṭheh tumna awm mekah MNF Kolasib Block Press Release ah chanchinbu mite chu dawt puangzar/thehdarh anga puh an nih chu an hmai ti bal thei a nih avangin vawiin July 14, 2023 khan 'Emergency Meeting' neiin an tih ngai loh angin MNF PR chu an chhanglet.

An chhanletna PR hi a hnuai ami ang hi a ni.

1. KVK, Kolasib ramah In hmun ṭheh tumna a awm ni a kan hriat avangin chanchinbumi ṭhenkhat te chuan thil awmzia hriat tumin July 6, 2023 khan a hmunah an tlawh a. KVK ramah hian In hmun ṭhehna tur perh (peg) tam tak khen a ni tih an hmu a. A hmuna tlawhtute hian khawtlang hruaitu ṭhenkhat te an bia a, thil awmdan an zawhchian hnu ah he thil hi Vengthar MNF party hotute hmalakna a nih thu dawn a ni. KVK lam pawhin an hriat loh a perh (peg) khen a nih avangin dan lova ram chhuh luih tumna (encroachment) niin kan ngai. Mi ṭhenkhatin party pakhat Press Release behchhana puangzar anga min sawina hi 'dawt' a ni a, eng party in nge KVK ram chungchangah hian Press Release siam kan la hre lo. A hnuah Kolasib bialtu MLA Pu K Lalrinliana, Minister hian helai ram hi a tlawh ṭumin ama tih tir a nih thu a sawi a ni.

2. In hmun neilo ten in hmun an neihna tura hmalakna hi MJA, Kolasib District chuan kan dodal lova, in hmun neilo tak tak leh mamawh ngawih ngawih; khawtual mi nghet ngei ten In hmun hi nei ngei se kan duhpui zawk a ni. Chumi kawngah chuan sorkarin 'dan' a nei a, 'dan' angin engkim kal tir hmasa in hmalak ni ṭhin se tih hi kan duh dan a ni.

3. Minister Pu K. Lalrinliana tour programme-ah 'In hmun neilo ten in hmun an beiseina hmun KVK ram a tlawh tur thu' MJA in a copy kan hmuh avangin news cover turin July 12, 2023 hian chanchinbumi ṭhenkhat chu a hmunah an kal a. Heng mite hi MJA anga kal an ni lova, mimal anga news cover tura kal an ni. Hetah hian kan beisei loh leh kan rin loh tak maiin kan Minister zahawm tak chuan Kolasib District MJA te chu dawt puangzar/thehdarh a, eptu party ang hiala min puhin, MJA member te chu kan awmna party nen lam a hriat vek thu, amah ṭawiawmtu official leh party workers te hriat laiin a sawi chiam mai hian min barakhaih tak zet a, hemi ṭuma video clip, a ṭhena zar chauh lang tura duhlai lai 'cut ṭhen' chu a tukah thehdarh a ni bawk.

4. Kolasib District MJA member te hi mi famkim leh fel bik kan ni lo tih kan in hria a, tlinlohna pawh kan nei thei a ni. Chutih rualin chanchinthar thehdarh kawngah a pawng-a takin thudiklo leh dawt kan chhuah kan la hre ngai lo. Inhnialna tichhuak thei chi angah te phei chuan thu lakna (source) rintlak kan neih loh chuan kan puangzar ngai lo va, KVK, Kolasib ram ṭheh tumna awmah pawh hian department hotute berin an hriat loh avangin keini chuan dan lova ram neihsak tumna (encroachment) niin kan hria a, source rintlak tak neiin kan puangzar mai chauh a ni.

5. MJA innghahna hi 'Service to the people (Mipui rawngbawltu)' a nih avangin ram leh khawtlang tana ṭha turah chuan huaisen takin ke kan pen ṭhin a, chutih laiin kan thu puanzarah dawt a tel a nih chuan Kolasib District MJA te hian ngaihdam kan dil hreh reng reng lo. Dawt puangzar anga inpuhna leh eptu party ang hiala inpuhna hi MLA/Minister leh politician dang reng reng ka aṭanga kan la hriat ngai loh a nih vangin tun ṭuma thil thleng pawh hi 'mak' kan ti a, na pawh kan ti hle. Thuthar kan puanzarna kawngah lungawilohna an nei a nih pawhin vantlang hmaa sawi hian awmzia a nei lova, tun hnuah chuan thleng tawh lo se kan duh takzet a ni.

6. Eizawnna atana chanchinbu/media hmangtute hi mithiam bik kan ni lo a, hei vang hian mi thiam zawkte ruaiin a khat tawkin 'Workshop' leh 'Seminar' pawh kan nei fo ṭhin. Kan tlin lohna tam takah pawh hmasawn zel tumin theihtawp kan chhuah ve ṭhin a, heti chung hian kan thlen chin ala thuilo tih pawh kan hai lo a ni. A thiam zawk leh tihdan ṭha zawk hria chuan media rawngbawlna pawimawh tak hi luhchilh turin kan sawm zawk a, kan luhchilh theilo a nih pawhin min finchhuah turin chanchinbumite chu kan in hawng reng a ni.

7. Minister Pu K. Lalrinliana hi ministry kal mekah hian minister fak hlawh pawl tak a ni a, ram tana a hmalakna kawng hrang hrangah kan lo thawhpui tawh ṭhin angin thawhpui zel pawh kan duh a. A kaihza vengtu party mite, Kolasib bial mipuite leh Mizoram hmun hrang hranga mite pawhin minister hi a hmalaknaah dan zah tak chunga ṭawiawm zel turin kan beisei a, chutiang tur chuan kan sawm nghal bawk a ni.

Issued by : MJA, Kolasib District.