Aizawl: Lai Autonomous District Council-a Chief Executive Member T.Zakunga chuan a kaihhruai Congress sawrkar chuan LADC-ah rorel turin member a ngah tawk tih Governor hnenah a hriattir tih sawiin, LADC sawrkar chu hnam sawrkar a nih vangin nghet takin ding se tih chu amah leh a kaihhruai sawrkarin an duh ber a nih thu a sawi a, LADC-a Congress sawrkar tlu mai tur anga sawi chungchangah mipuite thlaphang lo turin a chah.

CEM T.Zakunga hian press mite hnenah a kaihhruai sawrkar atangin Congress MDC pali leh Independent MDC pakhatten an thlawpna hnukdawk mah se elected MDC 12 a la neih bakah Nominated Member 3 nen member 15 an neih vangin member 28 awmna LADC-ah Congress chuan member a la ngah zawk tih sawiin, Nominated Member-ten sawrkar buknaah vote an nei thei lo nia sawi chu thu belhchiandawl lo a nih thu CEM chuan sawiin, LADC Constitution Conduct of Business Rules-ah Nominated Member ten Vote en neih theih leh neih theih loh thu inziak a awm lo niin a sawi a.

Kum 2007-ah Mara Autonomous District Council ah Gauhati High Court-in Nominated Member ten Vote an nei thei lovang tiin thutlukna siam mahse, kum 2013-ah Gauhati High Court vek chuan he thutlukna lo awm tawh sa hi hnawlin Karbi Anglong sawrkarah Nominated Member-ten vote an nei thei ang tiin thutlukna a siam a, Supreme Court thutlukna pawh hriat tur a awm tih a sawi a, hei vang hian LADC a, a kaihhruai sawrkar tlu mai tur anga sawi chu thu belhchiandawl lo a nih thu a sawi.

Congress Legislature Party chhuahsantu MDC 5 te chu huatna an neih loh thu T.Zakunga chuan sawiin, LADC dan dinglai an bawhchhiat vangin, Member an nihna hlihsakturin Governor hnen ah tunkar Ningani khan a thlen tih sawiin, Governor thutlukna an ngaichang mek tih a sawi a, Gauhati High Court-ah a rang thei ang ber a thlen nghal an tum thu a sawilang tel bawk.

LADC-ah hian elected member 25 leh nominated member 3 an awm a, T.Zakunga kaihhruai Congress Legislature party atangin tun hnai khan Congress MDC 4 leh Independent MDC 1 te chuan an thlawpna hnukdawkin MDC 8 nei MNF nen United Legislature Party an din a. Congress chu member nei tlem zawk nia sawiin Governor hnenah sawrkarna siamtir tura ngen an tum a ni.