ZALEN December 15, 2025: MPCC chuan vawiin khan Lai Autonomous District Council inthlana MDC tling tharte lawmpuina hun kan hmang. He hunah hian MPCC Vice President C. Ngunlianchunga, MLA, MDC tling thar leh LADC Congress Legislature Party Leader ni bawk chuan thu a sawi a, Aizawl an rawn kal chhunga thil thlen danah eng nge thleng zel dawn a hriat loh thu a sawi.

C. Ngunlianchunga, “Helaia kan rawn kal hian sawrkar mai turin kan rawn kal a, mahse van hmuna thlarau sual ho te avangin kan sawrkar dawn nge, dawn lo kan hre ta lova. Sawrkar siam tur hian ZPM te nen agreement kan siam a, sawrkar siam dan tur te pawh agreement-ah kan ziak vek a ni.

“Social Media ah khan 'Congress in MNF an bum a, ZPM in Congress an bum ve thung' tih post ka hmu a. ZPM hian min bum kan hre lova, kan inremna a tawp tih pawh kan la hre lo a ni. MNF te nen khan inthlan hma khan inremna kan nei a, kha kan inremna ah khan inthlan hma chauh nise, inthlan hnu lam chu la sawi that leh turin kan ti a ni. Kei ngei pawhin inthlan hma khan Congress candidate awmlohna ah chuan MNF candidate vote turin ka ti a ni. Mahse social media ah chuan MNF vote vek turin ka ti ni awmin an sawi leh a, chutiangin ka ti lo a ni. MNF hi kan bum lova, inthlan result puan hnu khan inbiak pawh kan inbia a ni. 

“MNF nen kan inbiak laiin ZPM ten min rawn dawr a, kan hotute nen kan sawiho hnu in ZPM te nen chuan agreement kan siam thei ta a ni. Tunah hian kan agreement kha a tawp tih pawh kan la hre lova, enge lo thleng zel dawn kan hre lo a ni. Kei hian hetia kan inbiakna ah hian leader ka claim lova, ka claim ngai lo a ni. CEM ka nih dawn pawhin ka claim lova, Minister ka nih dawn pawhin ka claim lo a ni.

“MDC-ah hian din hi ka tum lova, MLA nilai ka ding a ka tla anih chuan a mualphothlak hle dawn a. Kan party atang kan pafa a ding tura nawrna a nasa em em a, chhungkua kan inrawn a, kan tawngtai a, ding lo turin thu kan titlu a. MDC Candidate tur te pawh kan President in thuneihna min pek angin ka approve a ni nghe nghe. ZPM in Vengpui Candidate an han puang kha vengchhung mi, party hrang hrang atang khan ding tura min nawrna a nasa em em a, kan hnar thei ta lo a ni."

“Inthlan campaign lai khan ka dinna bial ah khan ka awm hman mang lova, bial hrang hrangah ka kal kual a, kan hotute leh kan campaigner te zarah leh Pathian zarah heti zat hi kan tling a ni. Congress party lo ni tawh hmun danga peng te an rawn let nasa em em a, khaw tinah mithar lawmluh kan nei zel a, a lawmawm em em a, Lai District ah chuan Congrese Revival a thleng nasa hle a ni."

“Tun tuma bum anga kan awm pawh hi kan tana tha tur zawk ani ang tih ring ila, sawrkar tha tak siam se kan duh a ni. Council sawn ba nuaih 500 vel an nei a, state a rulling lai ZPM an ni a, an ni pawh hian leiba saw rulh sak thei se kan duh hle a ni.” a ti bawk.

LADC Inthlanpui neih ah khan MNF chuan Seat 25 ah Seat 8 lain, Congress chuan Seat 7 an la a, ZPM in Seat 6 an chang a, BJP leh Independent ten Seat 2 ve ve an chang.

Inthlanpui Result hriatkim a nih atangin LADC ah Sawrkarna siam tumin Political Party te ah indawrna kalpui chhunzawm niin, nizan khan ZPM leh MNF ten Sawrkar intawm siam turin thutlukna siam felin, Lairam Legislature Party diin an hruaitu atan ZPM Member Vawmbuk bialtu MDC T.Zakunga an thlang a, vawiin hian LADC ah Sawrkar thar din turin bawhzui ngaite bawhzui nghal a ni.

ZPM leh MNF ten inremsiamna an neihdan chuan CEM chu ZPM-in an chang dawn a, MNF lamin Chairman leh Deputy CEM bakah Executive Member 3 an chang tel dawn a, tihian ZPM lam chuan Executive Member 5 an chang ang, Executive Member rank tho, hmunawl dang chu Party pahnih thawhdunna Lairam Legislature Party-in ruahmanna an siam ang tih a ni.