Aizawl: Lai Autonomous District Council buai chungchang chu Law Department zirchian tura dah mek a ni. Ruat seat MDC 3 te’n sawrkar buknaah vote an thlak thei dawn em? tih chu an enfiah tur ber nia thudawn a ni.

Zalen palaiin District Council Affairs Department thawktute hnen atanga thu a dawn danin tuna sawrkarna chelhtu leh pawl lehlam atangin thiamthu an sawi ve ve a, High Court thuchhuak te a lo awm tawh bawk avangin anmahni maia chingfel lovin fimkhur thilah Law Department chinfel turin an thawn tih an sawi a. District Council Affairs thu thlen hi Law Department chuan an hmu tawh a, mahse zirchianna tak erawh an la nei hman lo niin Law Secretary Marli Vankung chuan Zalen a hrilh.

LADC-ah hian elected MDC 25 leh nominated MDC 3, an vaiin 28 an awm a. Congress sawrkar, T.Zakunga kaihhruai a Congress MDC 4 leh Independent MDC 1 te chuan tunhnai khan sawrkar an thlawpna hnukdawkin MDC 8 nei MNF nen United Legislature Party dinin Governor hnenah MDC 13 an neih avangin sawrkarna siamtir turin an ngen a. Congress lam erawh chuan elected MDC 12 bakah nominated MDC 3 nen MDC 15 an la neih avangin sawrkarna an la chelh zui thei niin an sawi thung a, sawrkar siam theiah an inchhal ve ve a ni.