Aizawl: Gauhati High Court, Aizawl Bench chuan Lai Autonomous District Council buai chungchang chu Mizoram Larsap chinfel turin a kutah a dah.

Gauhati High Court hian Zirtawpni tlai khan thuremna tichhuakin Lai Autonomous District Council-a sawrkarna siamtu nih inchuhna chu Governor chinfel tur leh a thuneihnaah a dah tih a sawi.

Tarlan tawh thin angin LADC ah hian elected member 25 leh nominated member 3, an vaiin member 28 an awm a. Chief Executive Member T.Zakunga kaihhruai atangin Congress MDC 4 leh Independent 1 te chuan MNF MDC 8 te nen United Legislature Party an din a, LADC ah elected member nei ngah zawk an ni tiin sawrkarna siamtir turin an ngen a. Congress lam chuan nominated member ten sawrkar bukna ah vote an nei thei niin an sawi ve thung a.

Hei bakah hian Congress atanga chhuak te chu ban (disqualify) tur leh LADC Chairman-in session a kohte chu dan dinglai kalh a ni tiin an buaina hi court-ah kalpui a ni ta a ni.