Roman Abramovich-a hunlai khan an chetchhiat deuh chuan manager an ban mai thin a, Stamford Bridge lama Todd Boehly-a'n thuneihna a rawn chan hnuah pawh an zia an la thlak ta chuang.

Tun hma lam atangin, Chelsea hian inkhel result tha an neih loh chuan an manager te chunga tuan an hrat a, an pawisa hloh tur lam ngaituah lem lovin match pawimawha an chakloh chuan an manager te an ban mai thin. Chutianga an chet dan chu neitu thar neih hnuah chuan a reh deuh an rin laiin a thleng leh ta.

Boehly-a'n Chelsea-ah thuneihna ni 100 bawr chauh a la neih chungin, Frank Lampard thlaktu thlaruk lek a enkawl hnua 2021 May thlaa Champions League chawipuitu puitu an manager Thomas Tuchel chu an ban leh ta hmiah mai. 

Chelsea hian tun season-a an Champions League game hmasa berah Dinamo Zagreb an hneh lo va, tin 2022-23 season-ah bul an tan tha lem lo, game 7 khelh tawhah tum 3 chiah an la chak bawk avangin club thuneitu ten an rinna an nghat ngam ta lo a nih hmel. 

German manager hian game 100-ah Chelsea hi 60% a chakpui thei a, Chelsea reilote a enkawl chhungin UEFA Champions League, UEFA Super Cup leh FIFA Club World Cup te a chawipui tawh a ni. Tun nipui transfer-ah sum an seng hnem em em a, tum khata bazar nana sum hmang tam ber record siamin £255.3million zet an seng chunga an beisei anga an chetthat leh si loh vangin tiang hian an che ta phut a nih hmel. 

Tuchel aiawh tur tih chian a la awm lo va, manager lak mai theih tur hming erawh an tlar leh thut tawh a chung zingah chuan Brendan Rodgers-a hming a langsar ber rih a nih hmel. Tuchel aiawh mai thei te chu:
Brendan Rodgers
Diego Simeone
Frank Lampard
Graham Potter
John Terry
Jorge Sampaoli
Marcelo Bielsa
Massimilano Allegri
Mauricio Pochettino
Roberto Mancini
Roberto Martinez
Zinedine Zidane