Aizawl February 28, 2024 : MNF chuan ZPM ten campaign lai khan lalna leh thuneihna an duh luatah, MNF sawrkar chu a chhe thei ang berin an bei thin a, Engkim chhe vekah an puh. Tunah hian MNF sawrkar kalta an beihnaa an dawt sawi alang chhuak mek zel a ni an ti.

MNF chuan leader Lalduhoma ngeiin, TV interview-ah leh mipui hmaah Mizoram sum dinhmun chhiat zia sawiin, GSDP pawh -9.6 a nih thu a sawi thin a. Hmaichhanah mithiamin a 'sawi dik lo' tih an hrilh hnuah pawh aw ki sang tak hmangin a la sawi lui tlat zel a, tichuan, nimin maia budget a pharhnaah thudik tak chu a lo lang an ti.

"Amah ngeiin a dawt lo sawi thin chu a rawn inphawrh mualpho ta a ni. Nimina budget a pharhnaah Finance Minister a nihna angin kum 2022 - 2023 chhunga GSDP chu 10.14 a nih thu a rawn sawi ta a, kum 2023-2024-ah chuan 10.55 a nih rin a nih thu a sawi ta hial a ni," an ti.

MNF chuan, "Hetiang hi thil awmzia a nih chhoh zel tak avang hian, ZPM in kan ram kaihhruai hna an thawh mekah an inzawrhna ang lo takin kan ram tan beisei an sang lo hle mai a. A tuk lawka lang leh mai tura Dawt sawi thin hi kan Chief Minister leh a kaihhruai party te hian sim tawh se kan duhin kan chah nghal bawk a ni," an ti bawk.