Aizawl July 7, 2022 : Tukin zing khan MNF Founder President Laldenga (L) thih champha vawi 32-na pualin a thlan, Aizawl Treasury Square-ah hun hman a ni a. MNF President leh Chief Minister Zoramthanga chuan Pathian leh kan ram tan tih hi a tehkhawnga hmangin harsatna karah pawh i ding zel ang u, a ti

Laldenga thlana inkhawmah hian MNF President Zoramthanga chuan Laldenga thihcham vawi 32-naa tel zawng zawngte chibai a buk a, "Pu Laldenga hova bultan MNF chu kum 1966 atang tawh khan a ral leh mai ang, thisen chhuah hmang an ni, tiin politician-ten an sawi thin. Amaherawhchu, Mizoramah tualto party tlo lo tam tak karah MNF chuan kum 60 hmel a hmu thei ta a ni. Jet fighter, armour car, laipui, machine gun leh politics nen kawng tinrengin MNF chuan beih a tawk a. Mahse Pathian kaihhruainain a thiltum tihlawhtling turin mal a sawm a. Tualto party dangte chu kum 10 pawh daih lo tam tak an awm tawh a. Chu'ng karah chuan MNF chu vawiin thlengin a la parvul zel," a ti. "Pu Laldenga thihchamah hian kan din chhan (Pathian leh kan ram tan) hi a tehkhawnga hmangin harsatna karah pawh i ding zel ang u," tiin kalkhawmte a sawm.

He hunah hian Laldenga (L) nupui MNF Adviser Lalbiakdiki pawhin thutawi sawiin, Laldenga chawimawia a awm chu lawmawm a ti a. A thlan chunga chawimawinate chu Denga pawh khan a beisei phak a rin ngai loh thu a sawi.

Laldenga hi July 11, 1927-ah Lunglei Pukpui khuaah a piang a, kum 1944-ah British Indian Army a zawm. Kum 1959-ah Mizo National Famine Front chu a hova din niin, October 22, 1961-ah Mizo National Front (MNF) tiin thlak a ni.

Laldenga hi kum 1986 khan Mizoram sorkar lailawk (interim)-ah Chief Minister a ni a, kum 1987-a Mizoram state Assembly inthlan hmasa berah Sateek leh Aizawl North-II bial aṭanga thlan tlin a ni a, state nih hnua Chief Minister hmasa ber a ni.

Kum 1990 khan Cancer a nih hriatchhuah a ni a, Memorial Sloan Kettering Cancer Centre, USA-ah thla thum enkawl a nih hnuin Mizoram pana an haw kawng Ashford Hospital, London-ah July 7, 1990, India sanaa tlai dar 2:30-ah a thi.

Laldenga ruang hi July 11, 1990 tlai dar 4:30-ah Tuirial Airfield-ah helicopter-in phurh thlen a ni a, July 13-ah vui niin, Mizote zinga state funeral-a vui awm chhun a la ni.