ZALEN August 25, 2023 : Vawiin khan Golden Hall, Congress Bhawan-ah Friday Political neih a ni a, he hunah hian Aizawl North-II Congress Party MLA Candidate tur R. Lalrinmawia chuan thu a sawi a, MPCC President Lalsawta hova Mizoram siamthat thalaite'n an chak tawh niin a sawi.

Lalrinmawia chuan, "Aizawl North-II thalaite’n Lalsawta hova Mizoram tana sawrkar tha siam an chak a, an phur takzet a ni. Kan beisei phak bakin thalaite-ah phurna a nasa a. MPCC President Pu Lalsawta'n Pathian a tih zia leh Pathianin a kal kawng a sial sak zia hi ka hmu a, Mizoram mipui pawhin an la hmu thuai dawn,” a ti. 

Lalrinmawia chuan, "Mizoram hi khawvel hmun hrang hranga Mizote Inpui a ni a. He hmunah hian an thlamuang a ni. Hripui leng avang te, nekchhep leh tihduhdahna avanga thlamuang taka an awm theih nan te, an sahimna atan te an lo haw khawm ruih ruih a, an lu nghah nan an lo haw a ni. Hetianga min hruaikhawmtu Pathian remruatna hi a fingin a rintlak em em a, ringhlel lova kan indawmkan tawn a ngai a ni," a ti. 

Aizawl North II Congress candidate chuan, "Ni 100 chuang teh meuh Manipura kan unaute chu BJP sorkar in rawva takin an sawisa a. Kan tawrhna nasat zia leh rapthlak zia hriain khawvel ram hrang hrang leh pawl hrang hrang an au chhuak a. India rama roreltu BJP erawh kan hnam leh kan sakhua a ral a, kan chimih hun an nghakin a ngawi hmak. Hetiang a nih avang hian kan tanrual a ngai takzet. Kan ram kan hnam, kan sakhua humhim turin Congress party-ah haw khawm a hun, kan tu leh faten min dem lohna turin hei hi hmanhmawha tih a ngai tawh a ni. Pu Lalsawta hruaina hnuaiah system tha tak nen kawng hrang hrangin hma kan la ang a. Pathian ringlo mite awt tawh lovin, he kan ramah ngei hian thlamuang leh hlim takin kan awm tawh ang,” a ti bawk.