Aizawl April 28, 2023 :Vawiin khan Serlui Block Congress Committee Conference 2023, Vairengte Multipurpose Hall-ah hman a ni a. MPCC President Lalsawta chu Khuallian niin a hman pui a, Serlui mipuite chu anmahni leh an tu leh fate tan tun tum inthlan tur hi hmachhawn turin a chah.

MPCC President Lalsawta chuan, "Mahni thawhchhuah thawhkhawm hmanga Serlui Block Congress Conference neih a ni chu Mizoramin Politics-ah mellung thar phuntu leh hmahruaitu in ni, tih sawiin, hei hi Congress zia tur a ni a. He kalphung hi 2023 MLA inthlan kan hmachhawn dan tur a ni. Mizoramin Politics hmelthar a hmuh chak chu Serlui bial Congress mipuiin a takin in lantir a ni, taimakna leh dikna, huaisenna nen, nangmahni leh in tu leh fate tan he inthlan hi hmachhawn ang che u," a ti. 

Lalsawta chuan, "Mipui tana lem nuam leh kawng awlsam ka tiam ve thei lo che u. Kawng awlsam hi Lal Isua min zirtir dan a ni lo. Rim taka thawka mahni thawhchhuah eia in in, hnam taima ni turin ka duh che u a ni. Kuthnathawktute, mi taima leh thawkrimte dinchhuahna ram din hi ka tum a ni. Thu thluanga awma duhsak nghak turin engmah ka tiam ve thei lo che u. In tan ding nghet ula, rinawm ula, taima rawh u. Mi tih ang pangngai kan tih ve ringawt hian dam khawchhuahna a awm lo. Mi aia kan danglam ngam zel a ngai," a ti. 

Tang Puihna chungchang sawiin, "Retheihna sal atanga chhuak turin in thawhchhuah a ngai. Dinchhuah tum, mahni inchhanchhuah tum te tan 'Tang Puihna' kan pe dawn che u. Retheihna in a sal beh, an retheihna remchanga hmanga vau beh leh rilru him pawh pu thei loa sawi thaih tawkte tan Congress Party-in Zalenna dar kan vua a ni," a ti. 

Lalsawta chuan Serlui bialah Congress thlipui a tleh angin India ram state lian Karnataka leh Madhya Pradesh-ah Congress a sawrkar ngei dawn tih a sawiin, "Kum 2024-a India rama Lok Sabha inthlanpui neih a ni dawn a. India ramah Congress kaihhruai sawrkar a piang thuai dawn. Eptu party ten Rahul Gandhi chungah rinna an nghat a, Opposition Party lian ten Congress kaihhruai sawrkar siam duhin hma an la a. Congress sawrkar a piang ngei dawn," a ti bawk. 

Serlui Block Congress Committee Conference 2023ah hian MPCC Secretary Rosiamngheta, Aizawl Municipal Corporation Ward No. V Corporator chu Khualzahawm a ni. MPCC President Lalsawta chuan mi thar 467 (chhungkaw 203) a lawmlut a ni.