Aizawl July 14, 2023 : Vawiin khan MPCC chuan mi thar lawmluh inkhawm, Lal Thanhawla Auditorium, Congress Bhawan, Aizawlah hman a ni a. Mithar lawmluttu MPCC President Lalsawta chuan mi tha lo te hnuaia an kun lohna turin mi tha te chu politics-ah zuanglut turin a ngen a, chhuan lo la awm zel tur te tan ram tha zawk din pui-ah a sawm bawk.

He huna thusawitu MPCC President Lalsawta chuan, "Kan ram dinhmun kan hria a. HIV/Drugs/Eirukna leh thluaka sum lut natna a hluar hle a. Ral atangin heng hi a thlirtu kan ni thei lo. Politics hmanga do let a ngai a. Edmund Burke chuan sual hneha awm dan awlsam ber chu, "mi tha te an ngawih reng hi a ni," a ti tih sawiin, Politics tha lo titute chu mi tha lo te hnuaiah an kun tho ang. Heng mi tha lo te hnuaia kan kun lohna turin mi tha te lo chhuak ula, keini leh chhuan lo la awm zel tur te tan ram tha zawk i din ang u," a ti. 

Lalsawta chuan, Congress Party zawm tharte chu an kal tumna, an chuanna lam pan tura driver-in motor a khalh loh vangin chhukin an tum ram pan turin he hmunah hian Sawrkar tha siam turin an lo kal a, an tum ram an pan tur chu Congress party chuan an hlenchhuah sak dawn tih a sawi. "Congress party hi ram siam thatna inpui a ni a. Mahni ina lut in nih avangin in inthlahrung thiang lo. Ram rorelna tha siam turin nangni hi kan sawt pui dawn che u a, kan chakna in ni tih kan hria, ram tha zawk in beisei hi kan thlen pui ang che u," a ti. 

Congress President-in a lawmluh te hi VL Remruatpuia Political Affairs Committee member, Research Wing member, Market Study Team Member, ZPM General Hqrs; Lalsanglura Ralte, Political Affairs Committee member, Ṭawngṭai Pawl Secretary, ZPM General Hqrs; Lalhmingthanga Sailo, Executive Member ZPM General Hqrs, Samuel Lalhriatrenga, Ramnghaki te bakah Aizawl leh a chhehvel khua atangin mi 170 chuang te an ni.