ZALEN August 20, 2023 : Lamka leh Aizawl inkarah helicopter service-tir tum ni mah se engtikah nge a thlawh tan dawn hriat a ni hrih lo.

Aviation thawktute hnen atanga ZALEN thudawn danin helicopter service chungchang hi Manipur sawrkar hmalakna tur a nih avangin engmah an hriatpui lo tih an sawi a. A thlawh dan tur leh a chuan man tur pawh engmah hriat an la nei hrih lo niin an sawi bawk.

Manipur-a chi leh chi intihbuaina kal mekah tribal-ten sorkar laipui hnena helicopter service belh tura an ngenna leh Manipur sawrkar pawhin a thlen angin union home ministry chuan Lamka leh Aizawl inkar bakah Kangpokpi leh Dimapur inkara helicopter service hi a remti a ni.

Tun dinhmunah Mizorama khaw 26-ah helicopter hi a service mek a. Hetih lai hian khaw thenkhatah erawh passenger an awm mumal loh avangin an thlawk ngai meuh lo a, Mizoram chhungah chuan Champhai chu passenger tamna ber niin a thlawh hma thla khatahte an lo hauh lawk tawh thin a. Mahse, ticket erawh a hma ni-ah chauh an pe thin a, hei hi a chhan chu damlo leh eng emaw tul bik a awm thulh atan a ni.

Mizorama helicopter service hi state pawn, Guwahati leh Shillong-ah te damlo phurin an thlawk zauh zauh bawk a ni.