Manipur-a chi leh chi intihbuaina kal mekah tribal lamten sorkar laipui hnena helicopter service belh tura an ngenna leh Manipur sorkar pawhin a thlen angin union home ministry chuan Lamka leh Aizawl inkar bakah Kangpokpi leh Dimapur inkara thlawk tura tihna hriattirna a tichhuak.

Sorkar laipuia home ministry-in Zirtawpnia hriattirna a chhuahah hian state pahnih, Manipur leh Mizoram inkarah hian Lamka leh Aizawl inkar a thlawk ang a. Manipur leh Nagaland inkarah Kangpokpi leh Dimapur inkar a thlawk dawn bawk a ni.

Meitei nena May 3 atanga an inkara buaina a chhuah atang khan tribal-te hian Mizoram nena an inkara helicopter thlawhtir hi an duh thu an lo sawi tawh thin a. May 30-a Union Home Minister Amit Shah-a'n an state a tlawh tum pawh khan tribal hruaitute pawl,  Indigenous Tribal Leaders Forum (ITLF) chuan an lo thlen tawh.

Hemi hnua Shah-a'n a sawm anga an buaina chungchanga Delhi-a an inbiak tum khan an sawi nawn leh bawk a, hemi tum hian home minister hian tihhlawhtlinsak a tiam nghe nghe.

Home ministry-in hriattirna a chhuahah hian Manipur-a kum khat chhunga darkar 750 chauh thlawk tura tihna pawh kawng (route) thar pahnih an neih belh dawn tak avangin tihpun turin a ti a. A zat tur erawh la ennawn leh turin a ti.